Yevroittifoqda oziq-ovqat mahsulotlari, shu jumladan, non so‘nggi bir yil ichida qimmatlashib ketdi, deb xabar bermoqda YI statistika xizmati — Yevrostat.
“Non, sabzavotlar, go‘sht — yeguliklar qimmatlashdi. Oshpazlik moylari va yog‘lari narxlari ayniqsa keskin oshdi, biroq non kabi asosiy oziq-ovqat mahsulotlari ham sezilarli darajada qimmatlashdi”, — deyiladi Yevrostat saytida e’lon qilingan xabarda.
Ta’kidlanishicha, 2022-yil avgustida Yevroittifoqda non narxi 2021-yil avgustiga nisbatan o‘rtacha 18 foizga oshgan. “Bu 2021-yil avgusti bilan taqqoslaganda juda katta o‘sish, o‘shanda non narxi 2020-yil avgustiga qaraganda o‘rtacha 3 foizga oshgandi”, — deb ma’lum qiladi statistika xizmati.
Shu bilan birga, Yevrostat xabariga ko‘ra, ba’zi Yevropa mamlakatlarida oziq-ovqat narxlari boshqalariga nisbatan ko‘proq o‘sishi kuzatilmoqda. Non narxi o‘sishi bo‘yicha eng yuqori ko‘rsatkichlar Vengriyada (2022-yil avgustida +66%), Litvada (+33%), Estoniya va Slovakiyada (ikkalasida ham +32%) qayd etildi.
Ekspertlar aytishicha, bu qisman Rossiyaning Ukrainaga harbiy hujumi bilan bog‘liq. Rossiya va Ukraina don, bug‘doy, makkajo‘xori, yog‘li o‘simliklar (ayniqsa kungaboqar) urug‘i va o‘g‘it bo‘yicha yirik eksportchilar bo‘lgani sababli, urush dunyo bozoriga jiddiy ta’sir o‘tkazgan.
Izoh (0)