Belarus o‘z hududi orqali Rossiya armiyasiga yashirincha zarba berilishiga yo‘l qo‘ymaydi, bu haqda respublika prezidenti Aleksandr Lukashenko Belarus Xavfsizlik kengashi davlat kotibi Aleksandr Volfovich bilan uchrashuvda aytib o‘tdi, deb yozadi “RBK”.
“Rossiyani qo‘llab-quvvatlashga kelsak, yana bir marta takrorlayman: Belarus hududi orqali Rossiya qo‘shinlariga orqadan ham, yon tomondan ham, yonboshdan ham hech qanaqa zarba berilishi kerak emas. Va bunday bo‘lmaydi ham. Bu bizning o‘z ittifoqdoshimiz qarshisidagi burchimizdir”, — dedi Lukashenko.
U, shuningdek, Volfovichdan Belarus janubiy chegarasidagi vaziyat haqida qisqacha ma’lumot berishni so‘radi. “U yerda qarshi turish bo‘yicha muayyan tajribamiz bor edi, shu jumladan, batalyon taktik guruhlar tuzish, chegarani yopish bo‘yicha ham. Hozir vaziyat qanaqa va bundan buyon u yerda qanday harakat qilamiz”, — deya so‘radi Belarus prezidenti.
Xuddi shunday savolni u shimoli-g‘arbiy chegara himoyasi bo‘yicha ham berdi. “U yerda real xavflar mavjud. Albatta. Bu bizning armiyamiz uchun asosiysi. Yana aytaman, bizni Ukrainada jang qilmoqchi deb ayblash kerak emas. Biz o‘z Vatanimizni himoya qilishimiz kerak”, — dedi Lukashenko.
Belarus shimoli-g‘arbda Litva, g‘arbda Polsha, shimolda esa Latviya bilan chegaradosh.
Rossiya Ukrainada 24-fevraldan buyon maxsus operatsiya olib bormoqda. Lukashenko Belarus nizoda qatnashmayotganini va qatnashishni rejalashtirmayotganini bir necha marta ta’kidlagan. “Tag‘in meni qandaydir hujumni rejalashtiryapti, Ukrainani Belarus hududidan bombardimon qilmoqchi deb o‘ylamang. Sizning va mening farzandlarimiz jang qilishini hech ham istamayman. Ular nimani deb jang qilishi kerak?” — degan edi u avgustda.
Izoh (0)