19-sentabr kuni Meksikaning Michoakan shtati g‘arbiy sohillarida 7,6 magnitudali zilzila yuz berdi, deb xabar beradi Reuters. Kamida ikki kishi halok bo‘lgani aytilmoqda. Okean va atmosfera tadqiqotlari milliy boshqarmasi sunami xavfi haqida e’lon qildi.
USGS ma’lumotlariga ko‘ra, yer silkinishi Plasita de Morelos shaharchasidan 46 km janubi-sharqda qayd etilgan, zilzila o‘chog‘i 10 km chuqurlikda joylashgan. Shunisi e’tiborga loyiqki, ushbu yer silkinishi Meksikada 1985 va 2017-yillarda ikkita halokatli zilzila qayd etilgan kunda yuz berdi.
Shu zilzilalardan keyin har yili 19-sentabr kuni butun mamlakat bo‘ylab Milliy fuqarolar mudofaasi kuni doirasida profilaktik mashg‘ulotlar o‘tkazib kelinadi.
1985-yil 19-sentabrdagi zilzila Tinch okeanida Kokos tektonik plitasi sinishi natijasida yuz bergan va magnitudasi 8,1 ga teng bo‘lgan edi. Oqibatda 10 mingga yaqin odam halok bo‘lib, 30 ming kishi jabrlangan, 3 mingdan ortiq bino zarar ko‘rgandi.
Ikkinchi zilzila 2017-yil 19-sentabrda sodir bo‘lgan, epitsentri Morelos shtatidagi Axochyapan aholi punktidan 12 km janubi-sharqda joylashgan edi. 7 magnitudali yer silkinishida 65 kishi halok bo‘lib, qariyb 200 kishi jabrlandi.
Ijtimoiy tarmoqlarda vayron bo‘lgan binolar aks etgan videolar tarqalmoqda. Mahalliy OAVlar Mansanilyo shahrida ikki kishi halok bo‘lgani haqida yozmoqda.
Mamlakatning beshta mintaqasida qariyb 1,2 million iste’molchi chiroqsiz qolgan.
Izoh (0)