Donetsk yana o‘qqa tutildi, ozod qilingan Xarkov aholisi uylariga qaytmoqda. Urushning 208-kunidan fotoreportaj
O‘zini o‘zi respublika deb e’lon qilgan Lugansk va Donetsk xalq respublikalari hukumati 19-sentabr kuni zudlik bilan Rossiyaga qo‘shilish bo‘yicha referendum o‘tkazishni taklif qildi. Xerson viloyatining Rossiya nazoratidagi ma’muriyati ham shunday referendum o‘tkazishni “aholi istayotgani” haqida ma’lum qilgan. Donetsk meri Aleksey Kulemzin Ukraina harbiylari tomonidan shaharning o‘qqa tutilishi oqibatida 13 kishi halok bo‘lganini ma’lum qildi. LXR Oliy sudi Yevropada Xavfsizlik va hamkorlik tashkilotining ikki xodimini vatanga xiyonatda aybdor deb topib, 13 yilga ozodlikdan mahrum qildi. Ukrainaning “Energoatom” kompaniyasi Rossiya harbiylarini Nikolayev viloyatidagi Janubiy-Ukraina atom elektr stansiyasini o‘qqa tutganlikda aybladi. Meduza urushning 208-kunidan asosiy fotosuratlarni jamladi.
Donetskning o‘qqa tutilishi
O‘qqa tutilib, halok bo‘lgan donetsklik odamning jasadi. Donetsk meri Aleksey Kulemzin 19-sentabr kuni Kuybishev tumanining o‘qqa tutilishi oqibatida 13 kishi halok bo‘lganini aytdi. Ukraina Qurolli kuchlari bu ma’lumotga izoh bermadi.Foto: “TASS”
Shifokor Kuybishev tumani o‘qqa tutilganidan keyin halok bo‘lgan fuqaroning jasadini tekshirmoqda.Foto: Anadolu
Donetsk aholisi vakillari hujum oqibatida singan oshxona oynalarini yog‘och qirindisidan bo‘lgan plitalar bilan yopmoqda.Foto: Anadolu
Xarkov viloyati ozod qilinganidan keyin aholi Troitskoye qishlog‘iga qaytmoqda
64 yoshli Olga Ukraina Qurolli Kuchlarining qarshi hujumi paytida ozod qilingan Troitskoye qishlog‘iga qaytib, 80 yoshli singlisi Galina bilan ko‘rishmoqda. Olga yarim yil Troitskoyedan uzoqda yashadi — bu vaqtda mintaqa Rossiya bosqini ostida edi.Foto: AFP
Uyiga qaytgan Olga (o‘ngda) va uning qarindoshlari Ukraina madhiyasini kuylamoqda.Foto: AFP
Troitskoye qishlog‘ida yashovchi 58 yoshli ayol Rossiya istilosi davrida uyida saqlagan Ukraina bayrog‘ini ko‘rsatmoqda. Bayroqdagi dastxatlar qishloqni ozod qilgan Ukraina Qurolli Kuchlari harbiylari tomonidan qoldirilgan.Foto: AFP
Izyum janglardan keyin
Izyum shahrida yashovchi fuqaro velosipedda o‘qqa tutilgan bino yonidan o‘tmoqda. Izyum shahar kengashi raisi Maksim Strelnikovning aytishicha, Rossiya istilosi paytida Izyumning kamida ming nafar tinch aholisi halok bo‘lgan, shahar infratuzilmasining 80 foizdan ortig‘i vayron bo‘lgan. Hokimiyatning asosiy vazifalaridan biri isitish tizmini tiklash bo‘lib qolmoqda.Foto: EPA
Ukraina armiyasining qarshi hujumi paytida tashlab ketilgan rus qo‘shinlari pozitsiyasi.Foto: EPA
Izyumda zarba tekkan uy vayronalari ostidagi majaqlangan mashinalar.Foto: EPA
Izyumdagi eksgumatsiya
Izyumlik ayol mart oyida shaharning o‘qqa tutilishi paytida halok bo‘lgan erining qabri ustida yig‘lamoqda.Foto: Anadolu
Eksgumatsiya o‘tkazadigan mutaxassislar ishni boshlashga hozirlanmoqda. Izyum prokurori Aleksandr Filchakovning so‘zlariga ko‘ra, shahar Rossiya ishg‘olidan ozod qilinganidan so‘ng 445 nafar tinch aholi ko‘milgan yana bir ommaviy qabr topilgan. Ayrim jasadlarda qiynoq izlari mavjud.Foto: Getty Images
Izyumdagi ommaviy qabr. Ishg‘ol paytida halok bo‘lgan shahar aholisining jasadlarini eksgumatsiya qilish davom etmoqda.Foto: Anadolu
Izoh (0)