Ugandaning Mubende okrugida Ebola virusidan kelib chiqadigan kasallikning yangi epidemiyasi qayd etildi. Bu haqda mamlakat Sog‘liqni saqlash vazirligi matbuot xizmatiga tayanib, “RBK” xabar berdi.
“Kasallikka chalinish holati Mubende okrugidagi Ngabano qishlog‘ida yashovchi 24 yoshli erkakda tasdiqlandi, unda Ebola belgilari bo‘lgan, keyinroq vafot etgan”, — deyiladi xabarda.
Jahon sog‘liqni saqlash tashkiloti ma’lumotlariga ko‘ra, 2020-yilning avgust oyi oxiriga qadar Ugandada jami to‘rtta Ebola epidemiyasi qayd etilgan: 2000, 2014, 2017 va 2018-yillarda. Eng katta va eng halokatli epidemiya 2000-yilda bo‘lib o‘tgan, unda 425 kishi kasallanib, 224 kishi vafot etgan.
JSST ma’lumotlariga ko‘ra, kasallikning inkubatsiya davri ikki kundan 21 kungacha davom etadi. Birinchi alomatlar — to‘satdan paydo bo‘ladigan isitma, mushak og‘rig‘i, bosh og‘rig‘i va tomoq og‘rig‘i. So‘ng qusish, ich ketishi, toshma, buyrak va jigar faoliyatining buzilishi, ayrim hollarda ham ichki, ham tashqi qon ketishi kuzatiladi.
Izoh (0)