Energiya narxlari tushib ketgani va Ukrainadagi qariyb yetti oylik urush qimmatga tushayotgani sababli Rossiya iqtisodiyotida keskinlikning yangi belgilari paydo bo‘ldi. Bu haqda CNN xabar bermoqda.
Rossiya Moliya vazirligi shu hafta e’lon qilgan ma’lumotlarga ko‘ra, Rossiya budjetining profitsiti yozda butunlay yo‘qoldi. Iyun oyi oxirida profitsit 1,37 trillion rublni (23 milliard dollar) tashkil etdi, avgust oyining oxiriga kelib u atigi 137 milliard rublga (2,3 milliard dollar) tushdi.
Budjet profitsiti — bu budjet daromadlarining xarajatlaridan oshib ketadigan summasi.
Mamlakat daromadlari bosim ostida — neft an’anaviy ravishda tabiiy gazdan ko‘ra Rossiya budjetining katta qismi hisoblanadi. Brent markasidagi neft narxi iyun oyining boshidagi eng yuqori narxidan taxminan 25 foizga tushdi.
Yevropada tabiiy gaz narxi nihoyatda yuqoriligicha qolayotgan bir paytda, Rossiyaning Yevropa Ittifoqi va Buyuk Britaniyaga gaz yetkazib berish hajmi yil boshidan beri 49 foizga kamaydi, — deyiladi “Gazprom” bayonotida.
Germaniya xalqaro va xavfsizlik masalalari institutining katta xodimi Yanis Klyugening so‘zlariga ko‘ra, iqtisodiyotni G‘arb sanksiyalari ta’siridan himoya qilish choralari va harbiy amaliyotlar tufayli xarajatlar keskin oshib bormoqda.
Uning so‘zlariga ko‘ra, Rossiya hukumati ma’lumotlari hozirda budjet taqchilligini ko‘rsatmoqda. Harbiy xarajatlar oshgani sayin mamlakat moliyasidagi kamomad yanada kengayishi mumkin.
Bu yil harbiy xarajatlar dastlab 3,5 trillion rublni tashkil etishi rejalashtirilgan edi, ammo bu ko‘rsatkich sentabr oyidayoq oshib ketdi, — dedi Klyuge.
Rossiyaning Moliya vazirligi hukumat idoralariga 2023-yilda xarajatlarni 10 foizga qisqartirish kerakligini bildirdi. Biroq mudofaa xarajatlari oshishi kutilmoqda.
Rossiya prezidenti Vladimir Putin iqtisodiy muammolarni inkor etib, mamlakat tashqi bosimlarga ishonch bilan dosh berayotganini aytdi.
Avvalroq Rossiya Markaziy banki asosiy stavkani 7,5 foizga tushirgani haqida xabar berilgandi.
Izoh (0)