Qozog‘istondagi eng yirik kompaniyalarni boshqaradigan jamg‘arma — “Samruk-Kazina” sanksiya rejimiga to‘liq amal qilishini va sanksiyalarga tushishi mumkin bo‘lgan loyihalardan chiqishga tayyorligini ma’lum qildi. Bu haqda jamg‘arma boshqaruvi raisi Almasadam Satkaliyev aytib o‘tdi.
Jamg‘arma geosiyosiy mojarolar natijasida yuzaga kelgan barcha sanksiyalarga to‘liq amal qiladi. Xususan, biz va bizning portfel kompaniyalarimiz konsalting, nazorat va fond bilan tuzilgan shartnomalarni ekspertiza qilishga ixtisoslashgan yetakchi yuridik firmalarni jalb qildik. Bu har qanday sanktsiyalardan, jumladan, ikkinchi darajali sanksiyalardan qochish uchun qilindi, — deydi “Samruk-Kazina” raisi.
Ta’kidlanishicha, davlat jamg‘armasi sanksiya rejimini buzadigan loyihalardan voz kechishga tayyor.
Satkaliyevning so‘zlariga ko‘ra, jamg‘arma kompaniyalarga nisbatan sanksiyalar qo‘llash xavfini oldini olish maqsadida tartibga soluvchi organlar, Tashqi ishlar vazirligi, tegishli xizmatlar va AQSH bilan doimiy aloqada bo‘lib, diplomatik korpus, elchilar bilan ish olib boradi.
Qozog‘iston Milliy farovonlik jamg‘armasi “Samruk-Kazina” 2008-yilda tashkil etilgan. Jamg‘arma mamlakatning eng yirik strategik kompaniyalari, jumladan Air Astana, “Qazaxtelekom”, “Kazatomprom”, “KazMunayGaz”, “Kazpost”, “Qozog‘iston temir yo‘li”, Kegoc va boshqalarni boshqaradi.
Avvalroq AQSH Rossiya va Markaziy Osiyo mamlakatlari iqtisodiyotlarini bir-biridan “ajratish”ga chaqirgan edi.
Izoh (0)