Арзон нефть ва уруш Россиянинг молиявий аҳволини оғирлаштирмоқда

Энергия нархлари тушиб кетгани ва Украинадаги қарийб етти ойлик уруш қимматга тушаётгани сабабли Россия иқтисодиётида кескинликнинг янги белгилари пайдо бўлди. Бу ҳақда CNN хабар бермоқда.

Россия Молия вазирлиги шу ҳафта эълон қилган маълумотларга кўра, Россия бюджетининг профицити ёзда бутунлай йўқолди. Июнь ойи охирида профицит 1,37 триллион рублни (23 миллиард доллар) ташкил этди, август ойининг охирига келиб у атиги 137 миллиард рублга (2,3 миллиард доллар) тушди.

Бюджет профицити — бу бюджет даромадларининг харажатларидан ошиб кетадиган суммаси.

Мамлакат даромадлари босим остида — нефть анъанавий равишда табиий газдан кўра Россия бюджетининг катта қисми ҳисобланади. Brent маркасидаги нефть нархи июнь ойининг бошидаги энг юқори нархидан тахминан 25 фоизга тушди.

Европада табиий газ нархи ниҳоятда юқорилигича қолаётган бир пайтда, Россиянинг Европа Иттифоқи ва Буюк Британияга газ етказиб бериш ҳажми йил бошидан бери 49 фоизга камайди, — дейилади «Газпром» баёнотида.

Германия халқаро ва хавфсизлик масалалари институтининг катта ходими Янис Клюгенинг сўзларига кўра, иқтисодиётни Ғарб санкциялари таъсиридан ҳимоя қилиш чоралари ва ҳарбий амалиётлар туфайли харажатлар кескин ошиб бормоқда.

Унинг сўзларига кўра, Россия ҳукумати маълумотлари ҳозирда бюджет тақчиллигини кўрсатмоқда. Ҳарбий харажатлар ошгани сайин мамлакат молиясидаги камомад янада кенгайиши мумкин.

Бу йил ҳарбий харажатлар дастлаб 3,5 триллион рублни ташкил этиши режалаштирилган эди, аммо бу кўрсаткич сентябрь ойидаёқ ошиб кетди, — деди Клюге.

Россиянинг Молия вазирлиги ҳукумат идораларига 2023 йилда харажатларни 10 фоизга қисқартириш кераклигини билдирди. Бироқ мудофаа харажатлари ошиши кутилмоқда.

Россия президенти Владимир Путин иқтисодий муаммоларни инкор этиб, мамлакат ташқи босимларга ишонч билан дош бераётганини айтди.

Аввалроқ Россия Марказий банки асосий ставкани 7,5 фоизга туширгани ҳақида хабар берилганди.