Япония бош вазири Фумио Кисида Буюк Британия қироличаси Елизавета II нинг давлат дафн маросимида қатнашмайди, деб хабар бермоқда Kyodo ҳукуматдаги манбаларга таяниб. Қироличанинг дафн маросими учун Японияга юборилган таклифнома икки кишига мўлжалланган.
Нашр суҳбатдошларининг айтишича, дафн маросимида Япония императори Нарухито ва унинг рафиқаси Масако иштирок этиши режалаштирилган.
Қиролича Елизавета II 8 сентябрь куни Шотландиядаги Balmoral қасрида 96 ёшида вафот этди. 10 сентябрь куни Ворислик кенгаши шаҳзода Чарльзни қирол Чарльз III номи билан Буюк Британия ва Шимолий Ирландия Бирлашган Қироллигининг янги монархи деб эълон қилди.
Елизавета II нинг дафн маросими 19 сентябрь куни бўлиб ўтади.
Жами ҳисобда маросимда бутун дунёдан 500 га яқин юқори мартабали амалдорлар иштирок этади. Аксарият мамлакатлар давлат раҳбари ва яна бир меҳмон учун таклифнома олган.
АҚШ президенти Жо Байден ҳамда Германия президенти Франк-Валтер Штайнмаер ҳам дафн маросимида иштирок этиши хабар қилинганди. Шу билан бирга Елизавета II нинг дафн маросимига Россия, Беларусь ва Мьянма давлатлари таклиф этилмаган. Бундан ташқари, Эрондан маросимда фақат элчи иштирок этади.
Изоҳ (0)