Kollektiv xavfsizlik shartnomasi tashkiloti (KXShT — Armaniston, Belarus, Qozog‘iston, Qirg‘iziston, Rossiya va Tojikiston kiradi) Armaniston-Ozarbayjon chegarasidagi vaziyat yana keskinlashishi fonida o‘z missiyasini Armanistonga yuborishga qaror qildi, deb yozadi Meduza.
KXShT bosh kotibi Stanislav Zas rahbarlik qiluvchi missiya maqsadi “yuzaga kelgan vaziyatga baho berish”dan iborat bo‘ladi. Missiya ittifoq davlatlari rahbarlari uchun ma’ruza tayyorlaydi, u kech kuzda Yerevanda bo‘lib o‘tishi rejalashtirilgan sessiyada taqdim etiladi.
Missiyani yuborish haqidagi qaror KXShT kollektiv xavfsizlik kengashining Armaniston tashabbusi bilan chaqirilgan shoshilinch yig‘ilishi yakunlariga ko‘ra qabul qilindi.
13-sentabrga o‘tar kechasi Ozarbayjon chegara yaqinida Armaniston hududini artilleriyadan o‘qqa tutdi. Boku bunga Armaniston tomonidan “keng ko‘lamli provokatsiya” sabab bo‘lganini ma’lum qildi.
Armaniston 49 nafar harbiy xizmatchisi halok bo‘lganini, Ozarbayjon esa o‘z tomonidan 50 kishi qurbon bo‘lganini ma’lum qildi.
Armaniston avvalroq vaziyatni tartibga solishda yordam so‘rab Moskvaga, KXShT va BMT Xavfsizlik kengashiga murojaat qilgandi. Armaniston mudofaa vaziri Suren Papikyan Rossiya mudofaa vaziri Sergey SHoygu bilan telefon orqali suhbatlashdi. Ular “vaziyatni barqarorlashtirish yo‘nalishida zarur qadamlarni tashlash haqida kelishuvga erishdi”, deya ma’lum qildi Armaniston Mudofaa vazirligi.
Rossiya Tashqi ishlar vazirligi “vaziyat keskinlashuvi munosabati bilan juda kuchli xavotir” bildirdi va nizo tomonlarini holatni yanada kuchaytirishdan tiyilishga chaqirdi. Rossiya prezidentining matbuot kotibi Dmitriy Peskov Rossiyada Armaniston-Ozarbayjon chegarasidagi vaziyatni tartibga solish bo‘yicha “ekspertlar darajasida qizg‘in ishlar” olib borilayotganini aytdi.
KXShT matbuot kotibi Vladimir Zaynetdinov tashkilot kuch ishlatishni nomaqbul deb hisoblashini aytdi va “ziddiyatlarni siyosiy-diplomatik usullar bilan tartibga solish”ga chaqirdi.
13-sentabr kuni kechqurun Armaniston va Ozarbayjon yana bir-birini otishmalarda aybladi. Shu bilan birga, Armaniston Mudofaa vazirligi ularning shiddati “ancha susaygani”ni ma’lum qildi. Ozarbayjon da’vo qilishicha, “Armaniston artilleriya va boshqa og‘ir qurol-yarog‘lardan foydalanib, chegara bo‘ylab yarashuv bitimini shiddat bilan buzmoqda”.
Izoh (0)