AQShning Oklaxoma shtati qamoqxonasida 48 yoshli mahbus Jon Basko o‘lik holda topildi.
Avvalroq u bolalar uchun mo‘ljallangan Baby Shark qo‘shig‘ini majburlab eshittirish orqali qiynoqqa solinganidan shikoyat qilgandi.
Basko o‘limining sababini aniqlash uchun tibbiy ekspertiza tayinlangan. Tergovchilar uning o‘limiga giyohvand moddalarning iste’moli sabab bo‘lishi mumkinligini taxmin qilishmoqda.
Jon Basko bir yil ichida ushbu qamoqxonada vafot etgan 14-mahbusga aylandi.
2021 yilda Basko va yana uchta mahbus qamoqxona xodimlari ularni Baby Shark qo‘shig‘i bilan qiynoqqa solganini ma’lum qilishgandi. Mahbuslarning aytishicha, ular qo‘shiqni qo‘llari kishanlanib, devorga qarab turgan holda “uzoq vaqt” tinglashga majbur bo‘lishgan.
“Qo‘shiq shu qadar baland ediki, u bino yo‘laklarida aks-sado berardi”, — deyiladi da’vo arizasida.
Natijada uch nafar qamoqxona xodimi mahbuslarga nisbatan qo‘pol muomalada bo‘lganlikda ayblangan. Ularning ikki nafari ishdan chetlatilgandi.
Ma’lumot uchun, Baby Shark bolalar uchun mo‘ljallangan akulalar oilasi haqidagi qo‘shiq bo‘lib, Koreyaning Pinkfong kompaniyasi mahsuloti hisoblanadi.
Qo‘shiq ayni paytda YouTube’da 11 milliard 305 million martadan ko‘p ko‘rilgan bo‘lib, eng ko‘p ko‘rilgan videolar ro‘yxatida peshqadam bo‘lib turibdi.
Izoh (0)