Sankt-Peterburg Smolninskiy tuman sudi prokuraturaning Smolninskoye munitsipal kengashini tarqatib yuborish imkoniyati haqidagi talabini qondirdi, ushbu kengash deputatlari avvalroq Rossiya prezidenti Vladimir Putinni lavozimidan chetlatishni taklif qilgandi, deb yozadi Meduza.
Peterburg prokuraturasi deputatlar kengashini tarqatib yuborish talabi bilan sudga 2021-yildayoq kengash uch oydan buyon yig‘ilmaganini pesh qilgan holda murojaat etgan. Ish qariyb bir yildan buyon siljimasdan turgan, ammo deputatlar Davlat dumasidan prezidentga nisbatan impichment e’lon qilishni so‘rashga qaror qilishi bilan, ish olg‘a ketgan.
Endi, sud munitsipal kengash uch oy mobaynida faoliyat yuritmaganini tan olganidan keyin, Sankt-Peterburg gubernatori uni tarqatib yuborishi mumkin.
Deputat Nikita Yuferevning aytishicha, ular ushbu qarorga norozi bo‘lib shikoyat arizasi bermoqchi.
Shuningdek, sud Putinni chetlashtirish haqidagi tashabbus muallifi, deputat Dmitriy Palyugani armiyani “obro‘sizlantirgani” uchun ma’muriy modda bo‘yicha 47 ming rubl jarimaga tortdi.
7-sentabr kuni Smolninskoye deputatlar kengashi Putinni lavozimidan chetlatish uchun Davlat dumasini unga qarshi davlatga xiyonat ayblovini e’lon qilishga chaqirishga qaror qildi — deputatlar fikricha, prezident tomonidan Ukrainada boshlangan urush tufayli, Rossiyaning “mehnatga layoqatli yosh” fuqarolari halok bo‘lmoqda, Rossiya iqtisodiyoti halokatga uchramoqda, NATO sharqqa qarab kengaymoqda, Ukraina esa yangi qurol-yarog‘larni qo‘lga kiritmoqda. Ko‘p o‘tmay, yetti nafar piterlik deputatlar politsiyaga chaqirildi, ularning besh nafariga nisbatan amaldagi hukumatni “obro‘sizlantirganlik” haqida bayonnomalar tuzildi.
8-sentabr kuni Moskvaning Lomonosovskiy munitsipal okrugi deputatlari kengashi Rossiya prezidenti Vladimir Putinga murojaat qilib, iste’fo berishni so‘radi. Deputatlar ta’kidlashicha, Putinning ikkinchi muddatidan boshlab “hamma narsa noto‘g‘ri yo‘ldan ketgan”.
12-sentabr kuni munitsipal deputatlar Rossiya prezidenti Vladimir Putinning iste’fosini talab qilib, petitsiya e’lon qildi. 13-sentabr holatiga petitsiya Rossiyaning turli shaharlaridagi qariyb 60 nafar munitsipal deputat tomonidan imzolandi.
Izoh (0)