Суд уруш туфайли Путиннинг истеъфосини талаб қилган Петербург депутатлари кенгашини тарқатиб юборишга рухсат берди

Санкт-Петербург Смольнинский туман суди прокуратуранинг Смольнинское муниципал кенгашини тарқатиб юбориш имконияти ҳақидаги талабини қондирди, ушбу кенгаш депутатлари аввалроқ Россия президенти Владимир Путинни лавозимидан четлатишни таклиф қилганди, деб ёзади Meduza.

Петербург прокуратураси депутатлар кенгашини тарқатиб юбориш талаби билан судга 2021 йилдаёқ кенгаш уч ойдан буён йиғилмаганини пеш қилган ҳолда мурожаат этган. Иш қарийб бир йилдан буён силжимасдан турган, аммо депутатлар Давлат думасидан президентга нисбатан импичмент эълон қилишни сўрашга қарор қилиши билан, иш олға кетган.

Энди, суд муниципал кенгаш уч ой мобайнида фаолият юритмаганини тан олганидан кейин, Санкт-Петербург губернатори уни тарқатиб юбориши мумкин.

Депутат Никита Юферевнинг айтишича, улар ушбу қарорга норози бўлиб шикоят аризаси бермоқчи.

Шунингдек, суд Путинни четлаштириш ҳақидаги ташаббус муаллифи, депутат Дмитрий Палюгани армияни «обрўсизлантиргани» учун маъмурий модда бўйича 47 минг рубль жаримага тортди.

7 сентябрь куни Смольнинское депутатлар кенгаши Путинни лавозимидан четлатиш учун Давлат думасини унга қарши давлатга хиёнат айбловини эълон қилишга чақиришга қарор қилди — депутатлар фикрича, президент томонидан Украинада бошланган уруш туфайли, Россиянинг «меҳнатга лаёқатли ёш» фуқаролари ҳалок бўлмоқда, Россия иқтисодиёти ҳалокатга учрамоқда, НАТО шарққа қараб кенгаймоқда, Украина эса янги қурол-яроғларни қўлга киритмоқда. Кўп ўтмай, етти нафар питерлик депутатлар полицияга чақирилди, уларнинг беш нафарига нисбатан амалдаги ҳукуматни «обрўсизлантирганлик» ҳақида баённомалар тузилди.

8 сентябрь куни Москванинг Ломоносовский муниципал округи депутатлари кенгаши Россия президенти Владимир Путинга мурожаат қилиб, истеъфо беришни сўради. Депутатлар таъкидлашича, Путиннинг иккинчи муддатидан бошлаб «ҳамма нарса нотўғри йўлдан кетган».

12 сентябрь куни муниципал депутатлар Россия президенти Владимир Путиннинг истеъфосини талаб қилиб, петиция эълон қилди. 13 сентябрь ҳолатига петиция Россиянинг турли шаҳарларидаги қарийб 60 нафар муниципал депутат томонидан имзоланди.