Qarshida 11 yoshli bola Lacetti urib ketishi oqibatida voqea joyida vafot etgani haqida xabarlar paydo bo‘ldi. Unda aytilishicha, haydovchi bolaga yordam ko‘rsatmasdan voqea joyidan qochib ketgan. Qashqadaryo IIB matbuot xizmati holat yuzasidan ma’lumot berdi.
Unda aytilishicha, voqea 11-sentabr kuni soat taxminan 14:01 larda Qarshi—Chim—Chiroqchi—Shahrisabz avtomobil yo‘lining 3-kilometrida yuz bergan. Lacetti haydovchisi X.F. mashinani Shahrisabz—Qarshi yo‘nalishida haydab ketayotib, yo‘lni piyodalar o‘tish uchun mo‘ljallangan qismidan o‘tayotgan voyaga yetmagan Y.A.ni urib yuborgan.
Oqibatda bola og‘ir tan jarohati olib vafot etgan.
Holat yuzasidan Qarshi shahar IIO FMB 3-sonli IIB huzuridagi TB tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘lishiga sabab bo‘lishi) bilan jinoyat ishi qo‘zg‘atilib, dastlabki tergov harakatlari olib borilmoqda.
Haydovchi T.M. ushlanib, unga nisbatan qamoqqa olish ehtiyot chorasi qo‘llanilgan.
Izoh (0)