Қаршида 11 ёшли бола Lacetti уриб кетиши оқибатида воқеа жойида вафот этгани ҳақида хабарлар пайдо бўлди. Унда айтилишича, ҳайдовчи болага ёрдам кўрсатмасдан воқеа жойидан қочиб кетган. Қашқадарё ИИБ матбуот хизмати ҳолат юзасидан маълумот берди.
Унда айтилишича, воқеа 11 сентябрь куни соат тахминан 14:01 ларда Қарши—Чим—Чироқчи—Шаҳрисабз автомобиль йўлининг 3-километрида юз берган. Lacetti ҳайдовчиси Х.Ф. машинани Шаҳрисабз—Қарши йўналишида ҳайдаб кетаётиб, йўлни пиёдалар ўтиш учун мўлжалланган қисмидан ўтаётган вояга етмаган Й.А.ни уриб юборган.
Оқибатда бола оғир тан жароҳати олиб вафот этган.
Ҳолат юзасидан Қарши шаҳар ИИО ФМБ 3-сонли ИИБ ҳузуридаги ТБ томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) билан жиноят иши қўзғатилиб, дастлабки тергов ҳаракатлари олиб борилмоқда.
Ҳайдовчи Т.М. ушланиб, унга нисбатан қамоққа олиш эҳтиёт чораси қўлланилган.
Изоҳ (0)