Shavkat Mirziyoyev va Eron prezidenti Ibrohim Raisiy ikki mamlakat o‘rtasidagi ko‘p qirrali hamkorlikni yanada kengaytirish masalalarini muhokama qilmoqda. Bu haqda prezident matbuot kotibi xabar berdi.
Samarqand shahrida rasmiy tashrif bilan bo‘lib turgan Eron prezidenti Ibrohim Raisiyni tantanali kutib olish marosimi bo‘lib o‘tdi. Davlat rahbarlari sharafiga faxriy qoravul saf tortdi, davlat madhiyalari yangradi. Shundan so‘ng ikki mamlakat rahbarlarining uchrashuvi bo‘lib o‘tdi.
Muloqot diqqat markazida o‘zaro savdo hajmini oshirish, kooperatsiyani kuchaytirish, sanoat, innovatsiyalar, qishloq xo‘jaligi, energetika, transport va logistika, boshqa ustuvor yo‘nalishlarda qo‘shma loyihalarni amalga oshirish masalasi turibdi.
Shuningdek, mintaqada samarali transport yo‘laklarini rivojlantirish imkoniyatlari ko‘rib chiqiladi.
O‘zbekiston va Eron yetakchilari dolzarb mintaqaviy masalalar, shu jumladan, Afg‘onistonda yuzaga kelayotgan vaziyat, SHHT doirasidagi ko‘p tomonlama hamkorlik masalalarini ham muhokama qiladi.
Avvalroq Eron Islom Respublikasi prezidenti Sayid Ibrohim Raisiy Samarqand shahriga yetib kelgani haqida xabar berilgan edi. Ta’kidlash lozimki, ushbu tashrif Eron yetakchisining so‘nggi 20 yildagi ilk tashrifidir.
Izoh (0)