“57 kunda Makkaga yetib bordik” — velosipedda Umraga borgan farg‘onalik otaxon safar taassurotlari haqida

Ijtimoiy tarmoqlarda farg‘onalik 66 yoshli otaxon velosipedda Hajga borgani haqida xabarlar tarqaldi. Otaxonning qariyb uch oylik safari bilan bog‘liq qiziq ma’lumotlarni eshitib, xonadoniga bordik. Yo‘l mashaqqatlari va ziyorat taassurotlari haqida suhbatlashdik.

Ahatali Mahkamov Farg‘ona viloyatining Bag‘dod tumanidagi Xitoy qishlog‘ida yashaydi. Yoshligidan velosipedda sayohat qilishga qiziqadi. Hajga velosipedda borishni niyat qilgach, bu yumush bilan astoydil shug‘ullana boshlagan. Uch yil davomida Bag‘dod tumanidan Marg‘ilon shahrigacha bo‘lgan 60-70 kilometr masofani velosipedda bosib o‘tishga ko‘nikkan. Shundan so‘ng uzoqroq masofaga sayohat qilib, o‘zini sinab ko‘rishga qaror qilgan. Avval Toshkent, keyin Samarqandga velosipedda qilingan safarlar otaxonning o‘ziga bo‘lgan ishonchini mustahkamlagan.

Otaxon 2022-yilning iyun oyida yaxshi niyat bilan Umra ziyoratiga otlanadi. Tojikiston, Qozog‘iston, Rossiya, Gruziya va Turkiya orqali 57 kun yo‘l yurib Makka shahriga yetib boradi.

Yoshligimdan velosiped minishga qiziqaman. Biror joyga bormoqchi bo‘lsam, yengil mashina yo jamoat transportidan ko‘ra velosipedda yurishni afzal ko‘raman. Ko‘pdan beri Haj safariga ham velosipedda borishni niyat qilardim. Bu niyatimni amalga oshirish uchun yillar davomida mashq qildim. Uch yil uydan Marg‘ilon shahriga velosipedda qatnadim. Oradagi masofa bir tomonga qariyb 60-70 kilometrni tashkil qiladi. Shundan so‘ng o‘zimni sinab ko‘rish uchun Toshkent va Samarqand shaharlariga sayohat qildim. Bu safarlardan keyin o‘zimga nisbatan ishonch paydo bo‘ldi, Saudiyaga boraman, degan qarorga keldim.

Tayyorgarlik ishlarini tugatib, yaxshi niyat bilan Uchko‘prik tumanida yashovchi sherigim bilan safarga otlandik. Iyunning boshlarida yo‘lga chiqib, shu oyning 13-kunida Tojikiston chegarasidan o‘tdik. Xorazm, Qoraqalpog‘iston orqali Qozog‘istonga bordik. Qozog‘iston bo‘ylab uzoq yurganimizdan keyin Rossiyaga qatnaydigan yuk mashinalariga duch keldik. Haydovchilar Marg‘ilondan ekan. Bizni to‘xtatib, quvvat bo‘ladi, yo‘lda charchamay yurasizlar deb, novvot choy bilan mehmon qilishdi. 10 kilometrdan keyin qumlik sahro keladi, u yerlarda velosipedda yurib bo‘lmaydi, deyishdi. Keyin sheriklariga telefon qilib, ikki kishi Umra ziyoratiga ketyapti, ularni o‘sha qumliklardan o‘tkazib qo‘yinglar, deb aytishdi. Aytilgan joyga yetib bordik, namanganlik yigitlar ekan, bizni qumliklardan o‘tkazib qo‘yishdi.

Rossiya chegarasidan velosipedda o‘tishga ruxsat berishmadi. Piyodalarga yo‘l yo‘q ekan. Chegaradan poyezdda o‘tib oldik. Undan keyin Chechenistongacha velosipedda yetib bordik. O‘sha yerda velosipedim buzilib qoldi. Chechen do‘stlarimiz uni tuzatishga ancha harakat qilishdi, lekin iloji bo‘lmadi. Keyin ularning taklifi bilan shu yerda qolib, Qurbon hayiti namozini o‘qidik. Ertasiga chechen do‘stimiz meni supermarketga olib borib, yangi velosiped sovg‘a qildi. Endi Umraga shu velosipedni minib borib, Ka’baga qarab meni duo qilib qo‘yasan, dedi. Eski velosipedimni o‘sha yerda qoldirdim.

Gruziya orqali Turkiyaga o‘tdik. Istanbulga borib, samolyotga chipta xarid qilib, Jiddaga uchdik. Yana velosipedimizni minib, Jiddadan Makkaga yo‘l oldik. Allohga shukur, 57 kun yo‘l yurib, Ka’baga yetib bordik. U yerda Umra amallarini bajarib, yurtimizga tinchlik, xonadonlarimizga qut-baraka so‘rab duolar qildik. O‘sha kunlari prezidentimiz Ka’battulohni ziyorat qilib, Umra amallarini bajardi. Prezidentimiz borganlarini ko‘rib, xursand bo‘ldik, faxrlandik. Makka shahrida 25 kun bo‘ldik, keyin Madinani ziyorat qildik.

Yo‘lda qiyinchiliklar, sinovlar ham ko‘p bo‘ldi. Tilni yaxshi bilmaymiz, imo-ishoralar orqali fikrimizni tushuntirishga harakat qildik. Baxtimizga, borgan joylarimizda yaxshi odamlarga duch keldik. Tunashga joy berishdi, mehmon qilishdi. Qiyin vaziyatlarda yordam ko‘rsatishdi. Boshida telefondagi xaritaga qarab yo‘l yurdik. Keyin uni ishlatmay qo‘ydik, so‘rab-so‘rab Makkaga yetib oldik”, — deydi Ahatali Mahkamov.