12-sentabr kuni O‘zbekiston O‘simliklar karantini va himoyasi agentligi hamda Misr Qishloq xo‘jaligi va melioratsiya vazirligi o‘rtasida Misrdan uzum qalamchasi va ko‘chatlarini olib kirishda fitosanitar talablari tartibi to‘g‘risida bayonnoma loyihasini imzolash masalasini ishlab chiqish bo‘yicha onlayn muzokaralar tashkil etildi. Bu haqda “Dunyo” agentligi xabar qildi.
Qayd etilishicha, suhbat chog‘ida agentlik rahbari Ibrohim Ergashev Misr tomoni bilan bayonnoma imzolanishi lozimligi va uzum ko‘chatlari turli zararkunandalardan tozalanganidan so‘ng ularni O‘zbekiston bozoriga olib kirish mumkinligini ta’kidlagan.
O‘z navbatida, Misr o‘simliklar karantini Markaziy boshqarmasi boshlig‘i Ahmad al-Attor hozirgi paytda hujjat loyihasi ko‘rib chiqilayotgani va yaqin kunlarda imzolanishini ma’lum qilgan.
“Tomonlar o‘zaro tashriflarni amalga oshirish, ikki mamlakatning qishloq xo‘jaligi mahsulotlariga bo‘lgan talab va ehtiyojidan kelib chiqqan holda o‘zaro hamkorlik aloqalarini yanada kengaytirish masalalarini kelishib oldi”, — deyiladi xabarda.
Izoh (0)