Farg‘onada viloyat bayram tadbirlarida fonogrammada qo‘shiq aytish taqiqlandi, endi ijrochilar sahnada cholg‘uchilar bilan birga jonli ijroda kuylaydi. Bu haqda viloyat hokimligi axborot xizmati xabar berdi.
Qayd etilishicha, viloyat hokimi Xayrullo Bozorovning Farg‘ona viloyati madaniyat va san’at sohasi xodimlari bilan uchrashuvi bo‘lib o‘tgan. Tadbirda viloyat madaniyat va san’at mas’ullari, teatrlar rahbarlari, viloyatdagi oliy ta’lim muassasalari rektorlari, san’atkorlar, so‘z ustalari, yosh ijodkorlar, turli jabhalarda mehnat qilayotgan sohaning fidoyilari ishtirok etgan.
Tadbirda so‘z olgan viloyat rahbari yig‘ilganlarga soha rivoji yo‘lidagi xizmatlari uchun, shuningdek, yaqinda o‘tkazilgan Mustaqillik bayramini katta muvaffaqiyat bilan tashkil etgani uchun minnatdorlik bildirdi. Shu bilan birga, aholi kayfiyatini ko‘taruvchi bayram tadbirlarini, turli madaniy-ma’rifiy kechalarni ko‘paytirish lozimligi ta’kidlandi.
Viloyat hokimi Farg‘ona viloyati madaniyat va san’at sohasini yangi bosqichga olib chiqish bo‘yicha qator tashabbus va vazifalarni e’lon qildi.
Xususan, viloyat hokimining o‘rinbosari Fayzullo Qosimov rahbarligida viloyat bayram tadbirlarini o‘tkazish bo‘yicha ishchi guruh tuzish, guruh tarkibiga viloyat madaniyat boshqarmasi mas’ullari, teatrlar rahbarlari, oliy ta’lim muassasasi rektorlari, taniqli san’atkorlar va ijodkorlar kiritilishi ma’lum qilindi. Ishchi guruh a’zolari har bir viloyat bayram tadbiri uchun yangi g‘oyalar, dasturlar, takliflarni o‘rtaga tashlab, biri boshqasini takrorlamaydigan ssenariylar ishlab chiqish uchun mas’ul bo‘ladi.
Viloyatdagi universitetlar, institutlar va texnikumlar rahbarlariga o‘z ta’lim muassasalaridagi yoshlar orasidan yangi iste’dodlarni kashf etish, ularning o‘z qobiliyatlarini namoyish eta olishlari uchun yetarli sharoit yaratib berish vazifasi yuklandi. Bu borada, ayniqsa, o‘ttiz ming talabani birlashtirgan Farg‘ona davlat universitetida yetarli ish tashkil qilinmaganiga tanqidiy e’tibor qaratildi.
Bundan buyon Farg‘ona viloyatida o‘tkaziladigan barcha tadbirlarda sahnaga chiqadigan qo‘shiqchilar va qo‘shiqlar ochiq tanlov asosida tanlab olinadigan bo‘ldi. Yangi qo‘shiqlar, yangi ijrolar kerakligiga urg‘u bergan viloyat hokimi, “San’atda yoshlar raqobatga chiqsin” degan fikrni bildirdi.
Viloyat rahbarining Farg‘onada viloyat bayram tadbirlarida fonogrammada qo‘shiq aytish taqiqlanishi, ijrochilar sahnada cholg‘uchilar bilan birga jonli ijroda kuylashi borasidagi ko‘rsatmasi san’at ahli tomonidan ma’qullandi.
Kelgusi yildan boshlab Farg‘onada va Qo‘qonda respublika teatrlari festivali, shuningdek, respublikadagi va qo‘shni davlatlardagi rus teatrlari festivali o‘tkazilishi belgilab berildi.
Izoh (0)