“Hisobotlar ochiq bo‘lishi kerak, aholi budjet mablag‘i qayerga ketayotganini bilsin” — Tanzila Norboyeva

Senatda Vazirlar Mahkamasining davlat budjetining 2022-yil birinchi yarim yillik yakunlari bo‘yicha ijrosi to‘g‘risidagi hisoboti muhokamasi jarayonida sog‘liqni saqlash sohasiga yetarli mablag‘ ajratilmayotgani qayd etildi.

Hozirda ajratilayotgan mablag‘ ehtiyojning 10 foizini qamrab olyapti.

Bu raqamlarning hammasi tahlil qilingan, tekshirilgan, aniqlashtirilgan. Raqamlarni qayerdan oldingiz, deyish umuman mumkin emas. Avvalgi yalpi majlisda ayrim raqamlar noto‘g‘ri, deb aytildi. Raqamlar qanchalik to‘g‘ri ekanini keyin asoslab berdik. Masala chaqaloqlar va onalar o‘limining oldini olish bilan bog‘liq bo‘lganda bu borada ajratiladigan mablag‘ uchun hech qanaqa e’tiroz bo‘lmasligi kerak. Iqtisod qilingan mablag‘lar bo‘lsa ham bu sohaga yo‘naltirish kerak, — dedi Senat raisi.

Senat yigirma sakkizinchi yalpi majlisida davlat budjeti ijrosi ko‘rib chiqilayotganda hisobotlar shaklini takomillashtirish masalasi ko‘tarilgan. Lekin hozirgacha o‘zgarish yo‘q. Hisobotda davlat aktivlarini sotishdan tushgan tushumlar, soliq tushumlari yoki boqimanda qarzdorlik masalalari, soliq imtiyozlari, ortiqcha to‘langan soliq summalari batafsil ochib berilmagan.

Bundan tashqari, moliyaviy nazorat tadbirlari bo‘yicha ham ma’lumotlar yo‘q. Qolaversa, ajratilayotgan mablag‘larni nazorat qilish — Moliya vazirligining vazifasi. Biroq bu borada sustkashlikka yo‘l qo‘yilgan.

Ochiq budjet shakllanayotgani odamlarning faolligini keskin oshirdi. Odamlar qanchadan qancha takliflarini bildirib, davlat budjetidan samarali foydalanish yo‘lga qo‘yilyapti. Shuning uchun hisobotlar ham ochiq, shaffof bo‘lishi kerak. Aholi mablag‘ qayerga ketayotganini bilishi kerak, — dedi Senat raisi.