Фарғонада вилоят байрам тадбирларида фонограммада қўшиқ айтиш тақиқланди, энди ижрочилар саҳнада чолғучилар билан бирга жонли ижрода куйлайди. Бу ҳақда вилоят ҳокимлиги ахборот хизмати хабар берди.
Қайд этилишича, вилоят ҳокими Хайрулло Бозоровнинг Фарғона вилояти маданият ва санъат соҳаси ходимлари билан учрашуви бўлиб ўтган. Тадбирда вилоят маданият ва санъат масъуллари, театрлар раҳбарлари, вилоятдаги олий таълим муассасалари ректорлари, санъаткорлар, сўз усталари, ёш ижодкорлар, турли жабҳаларда меҳнат қилаётган соҳанинг фидойилари иштирок этган.
Тадбирда сўз олган вилоят раҳбари йиғилганларга соҳа ривожи йўлидаги хизматлари учун, шунингдек, яқинда ўтказилган Мустақиллик байрамини катта муваффақият билан ташкил этгани учун миннатдорлик билдирди. Шу билан бирга, аҳоли кайфиятини кўтарувчи байрам тадбирларини, турли маданий-маърифий кечаларни кўпайтириш лозимлиги таъкидланди.
Вилоят ҳокими Фарғона вилояти маданият ва санъат соҳасини янги босқичга олиб чиқиш бўйича қатор ташаббус ва вазифаларни эълон қилди.
Хусусан, вилоят ҳокимининг ўринбосари Файзулло Қосимов раҳбарлигида вилоят байрам тадбирларини ўтказиш бўйича ишчи гуруҳ тузиш, гуруҳ таркибига вилоят маданият бошқармаси масъуллари, театрлар раҳбарлари, олий таълим муассасаси ректорлари, таниқли санъаткорлар ва ижодкорлар киритилиши маълум қилинди. Ишчи гуруҳ аъзолари ҳар бир вилоят байрам тадбири учун янги ғоялар, дастурлар, таклифларни ўртага ташлаб, бири бошқасини такрорламайдиган сценарийлар ишлаб чиқиш учун масъул бўлади.
Вилоятдаги университетлар, институтлар ва техникумлар раҳбарларига ўз таълим муассасаларидаги ёшлар орасидан янги истеъдодларни кашф этиш, уларнинг ўз қобилиятларини намойиш эта олишлари учун етарли шароит яратиб бериш вазифаси юкланди. Бу борада, айниқса, ўттиз минг талабани бирлаштирган Фарғона давлат университетида етарли иш ташкил қилинмаганига танқидий эътибор қаратилди.
Бундан буён Фарғона вилоятида ўтказиладиган барча тадбирларда саҳнага чиқадиган қўшиқчилар ва қўшиқлар очиқ танлов асосида танлаб олинадиган бўлди. Янги қўшиқлар, янги ижролар кераклигига урғу берган вилоят ҳокими, «Санъатда ёшлар рақобатга чиқсин» деган фикрни билдирди.
Вилоят раҳбарининг Фарғонада вилоят байрам тадбирларида фонограммада қўшиқ айтиш тақиқланиши, ижрочилар саҳнада чолғучилар билан бирга жонли ижрода куйлаши борасидаги кўрсатмаси санъат аҳли томонидан маъқулланди.
Келгуси йилдан бошлаб Фарғонада ва Қўқонда республика театрлари фестивали, шунингдек, республикадаги ва қўшни давлатлардаги рус театрлари фестивали ўтказилиши белгилаб берилди.
Изоҳ (0)