Charlz III rasman Buyuk Britaniya qiroli deb e’lon qilindi

10-sentabr kuni Londondagi Sent-Jeyms saroyida yig‘ilgan Valiahdlik bo‘yicha kengash ushbu maqomni tasdiqlaganidan keyin, Charlz III rasman Buyuk Britaniya qiroliga aylandi, deb yozadi “RBK”.

Valiahdlik bo‘yicha kengashga qirolichaning maslahatchilari — eng nufuzli va tajribali sobiq va amaldagi siyosatchilardan iborat Maxfiy kengash a’zolari kirdi. Ularning jami soni 700 ga yaqin bo‘lib, marosimda taxminan 200 kishi qatnashdi. Valiahdlik bo‘yicha kengash Charlz III ni qirol deb tasdiqladi, shundan keyin davlatning birinchi shaxslari tegishli proklamatsiyani imzoladi.

O‘z imzosini qo‘yganlar orasida qirolning o‘g‘li Uilyam (u yaqinda Uels shahzodasi unvonini qo‘lga kiritib, rasman valiahdga aylandi), Charlz III ning rafiqasi — qirolicha-konsort Kamilla Parker-Boulz, yaqinda Kengash lord-raisi etib tayinlangan (Maxfiy kengashni boshqaradi) Penni Mordont va bosh vazir Liz Trass ham bor.

Charlz III ning o‘zi marosimning ushbu qismida qatnashmadi. Ammo ikkinchi qism doirasida u qasamyod qabul qiladi va hokimiyatning meros bo‘lib o‘tishini ta’minlaydigan farmonlarni tasdiqlaydi.

Valiahdlik bo‘yicha kengash marosimida Britaniya sobiq bosh vazirlari — Boris Jonson, Tereza Mey, Devid Kemeron va Toni Bler ham ishtirok etdi.

Britaniyada vafot etgan qirolicha Yelizaveta II xotirasiga o‘n kunlik motam davom etmoqda.

Qirolicha Yelizaveta II 96 yoshida Shotlandiyadagi Balmoral qasrida vafot etdi. Ungacha shifokorlar uning salomatligi yuzasidan xavotir bildirib, unga kuzatuv ostida qolishni tavsiya etgan edi.

Uning o‘g‘li, 73 yoshli shahzoda Charlz avtomatik tarzda qirolga aylandi va o‘ziga Charlz III nomini oldi.

9-sentabr kuni kechqurun Charlz mamlakat aholisiga birinchi marta murojaat bilan chiqdi. U qirolicha Yelizaveta II munosib umr kechirganini qayd etdi va hayotining so‘ngiga qadar Britaniya xalqiga xizmat qilishga va’da berdi.

Shuningdek, qirol “mamlakatning yuragi bo‘lgan” konstitutsiyaviy tamoyillarni o‘zidan avvalgi monarx kabi — “mustahkam sodiqlik bilan” himoya qilishga va’da berdi.

Bundan tashqari, Charlz III to‘ng‘ich o‘g‘li Uilyamni Uels shahzodasi deb e’lon qildi (taxtga navbatda birinchi bo‘lib turgan nomzodga shunday unvon beriladi). Uning rafiqasi Ketrin Uels malikasiga aylanadi.