Moskvaning Lomonosovskiy munitsipal okrugi deputatlari kengashi 8-sentabr kuni Rossiya prezidenti Vladimir Putindan iste’foga chiqishni so‘radi.
Moskva munitsipal deputatlarining prezidentga qaratilgan murojaatida aytilishicha, hokimiyatning almashib turishi mamlakat muvaffaqiyatli rivojlanishi uchun muhim, Putinda esa ikkinchi muddatdan keyin “hamma narsa qandaydir noto‘g‘ri yo‘ldan ketgan: yalpi ichki mahsulot ikki baravar oshmadi, eng kam ish haqida aytilgan ko‘rsatkichgacha o‘smadi, Rossiyadan aqlli va ishga layoqatli odamlar ommaviy ravishda ketmoqda, va’da qilingan barqarorlikdan darak ham yo‘q”.
“Siz va qo‘l ostingizdagilar qo‘llaydigan dabdabali quruq gaplar uzoq vaqtlar mobaynida betoqatlik va tajovuzkorlik bilan bezatib kelindi, natijada mamlakatimiz oxir-oqibat Sovuq urush davriga tushib qoldi. Rossiyadan yana qo‘rqishni va nafratlanishni boshladilar, biz yana butun dunyoga yadro quroli bilan xavf solyapmiz”, — deyiladi Lomonosovskiy munitsipal okrugi deputatlari murojaatida.
Ularning xulosa qilishicha, Putinning qarashlari va uning boshqaruv modeli “umidsiz darajada eskirgan, Rossiya va uning insoniy salohiyati rivojlanishiga to‘sqinlik qilmoqda”. Shu munosabat bilan moskvalik munitsipal deputatlar Rossiya prezidentidan “o‘zini egallab turgan lavozimidan ozod qilish”ni so‘ramoqda.
8-sentabr kungi majlisida Lomonosovskiy okrugi deputatlari Moskva meri Sergey Sobyaninga qaratilgan murojaatnomani ham qabul qildi. Ular Moskvada mahalliy o‘zini o‘zi boshqarish tizimi deyarli ishlamasligini, tuman darajasida esa qo‘sh hokimiyat yuzaga kelganini, bu esa mahalliy fuqarolar va ularning vakillarining har qanday tashabbuslariga to‘sqinlik qilishini qayd etdi.
Avvalroq Sankt-Peterburgning Smolninskoye munitsipal okrugi kengashi deputatlari Putindan iste’fo berishni talab qilgan, shu sababli keyinroq politsiyaga chaqirilgan edi.
“Bizning barcha murojaatlarimiz aslida ularga qaratilmagan… Ular bizga javob bermasligini biz tushunib turibmiz… Bu ko‘proq, shu yerda, Rossiyada turib, bo‘layotgan voqealar uchun qayg‘urayotgan rossiyaliklarga yo‘llangan murojaatdir. Har safar biz ularga yolg‘iz emasliklarini, bu yerda biz ham borligimizni ko‘rsatishga intilamiz, bizlar — yuz berayotgan voqealarga qarshi bo‘lganlar ko‘p. Bu, propaganda aytayotganidek, ‘kam sonli sotqinlar’ emas. Biz juda ko‘pchilikmiz”, — dedi murojaat mualliflaridan biri Nikita Yuferev.
Izoh (0)