10 сентябрь куни Лондондаги Сент-Жеймс саройида йиғилган Валиаҳдлик бўйича кенгаш ушбу мақомни тасдиқлаганидан кейин, Чарльз III расман Буюк Британия қиролига айланди, деб ёзади «РБК».
Валиаҳдлик бўйича кенгашга қироличанинг маслаҳатчилари — энг нуфузли ва тажрибали собиқ ва амалдаги сиёсатчилардан иборат Махфий кенгаш аъзолари кирди. Уларнинг жами сони 700 га яқин бўлиб, маросимда тахминан 200 киши қатнашди. Валиаҳдлик бўйича кенгаш Чарльз III ни қирол деб тасдиқлади, шундан кейин давлатнинг биринчи шахслари тегишли прокламацияни имзолади.
Ўз имзосини қўйганлар орасида қиролнинг ўғли Уильям (у яқинда Уэльс шаҳзодаси унвонини қўлга киритиб, расман валиаҳдга айланди), Чарльз III нинг рафиқаси — қиролича-консорт Камилла Паркер-Боулз, яқинда Кенгаш лорд-раиси этиб тайинланган (Махфий кенгашни бошқаради) Пенни Мордонт ва бош вазир Лиз Трасс ҳам бор.
Чарльз III нинг ўзи маросимнинг ушбу қисмида қатнашмади. Аммо иккинчи қисм доирасида у қасамёд қабул қилади ва ҳокимиятнинг мерос бўлиб ўтишини таъминлайдиган фармонларни тасдиқлайди.
Валиаҳдлик бўйича кенгаш маросимида Британия собиқ бош вазирлари — Борис Жонсон, Тереза Мей, Дэвид Кемерон ва Тони Блер ҳам иштирок этди.
Британияда вафот этган қиролича Елизавета II хотирасига ўн кунлик мотам давом этмоқда.
Қиролича Елизавета II 96 ёшида Шотландиядаги Balmoral қасрида вафот этди. Унгача шифокорлар унинг саломатлиги юзасидан хавотир билдириб, унга кузатув остида қолишни тавсия этган эди.
Унинг ўғли, 73 ёшли шаҳзода Чарльз автоматик тарзда қиролга айланди ва ўзига Чарльз III номини олди.
9 сентябрь куни кечқурун Чарльз мамлакат аҳолисига биринчи марта мурожаат билан чиқди. У қиролича Елизавета II муносиб умр кечирганини қайд этди ва ҳаётининг сўнгига қадар Британия халқига хизмат қилишга ваъда берди.
Шунингдек, қирол «мамлакатнинг юраги бўлган» конституциявий тамойилларни ўзидан аввалги монарх каби — «мустаҳкам содиқлик билан» ҳимоя қилишга ваъда берди.
Бундан ташқари, Чарльз III тўнғич ўғли Уильямни Уэльс шаҳзодаси деб эълон қилди (тахтга навбатда биринчи бўлиб турган номзодга шундай унвон берилади). Унинг рафиқаси Кетрин Уэльс маликасига айланади.
Изоҳ (0)