Ukraina hukumati Rossiyadan o‘z hududiga bostirib kirilishi oqibatida yetkazilgan barcha zararlar qoplanishiga erishmoqchi, deb yozadi Meduza Ukraina adliya vaziri Denis Malyuskaga tayanib.
Uning so‘zlariga ko‘ra, BMT Bosh assambleyasida Kiyev tegishli rezolyutsiya qabul qilinishiga erishishni rejalashtirmoqda, zararni qoplash bo‘yicha xalqaro mexanizm kelajakda aynan shu hujjatga asoslanadi.
“Rossiya o‘zining tajovuzkor urushi bilan Ukrainaga yetkazgan barcha zararlar uchun kompensatsiya olishni istaymiz”, — dedi Malyuska. Uning so‘zlariga ko‘ra, hozir mamlakatda infratuzilma, uylar va sanoat obyektlarivayron bo‘lishi oqibatidagi zarar 300 milliard dollardan oshadi.
Mamlakat aholisiga yetkazilgan zararni hozir hisoblab bo‘lmaydi, dedi vazir. Uning qo‘shimcha qilishicha, urush chog‘ida halok bo‘lganlarning qarindoshlari ham kompensatsiya uchun huquqqa ega.
Ukraina “Katta yettilik” mamlakatlarida muzlatib qo‘yilgan Rossiya banki aktivlaridan foydalanish huquqini qo‘lga kiritmoqchi, deya aniqlik kiritdi Malyuska. Ularning qiymati aytib o‘tilgan kompensatsiya summasiga teng keladi. Bundan tashqari, Kiyev Rossiya davlat korxonalarining chet eldagi aktivlari va rossiyalik oligarxlarning musodara etilgan mulklaridan foydalanish huquqini ham talab qiladi.
Ukraina avval ham Rossiyadan o‘z hududiga bostirib kirganlik uchun kompensatsiya talab qilgan edi. Iyunda Ukraina Adliya vazirligi inson huquqlari bo‘yicha Yevropa sudiga da’vo kiritib, Rossiya qo‘shinlarining to‘liq olib ketilishini va Rossiya tajovuzi oqibatida jabrlanganlarga pul ko‘rinishidagi kompensatsiya taqdim etilishini talab qilgan edi. Hujumning birinchi bosqichida urushdan yetgan zarar 80 milliard dollarga baholangan edi.
Iyun boshida Ukraina bosh vaziri Denis Shmigal urushdan keyin mamlakatni qayta tiklash uchun 750 milliard dollar talab etilishini aytgan. Shuningdek, u rekonstruksiyani moliyalashtirishning bosh manbai Rossiya va rossiyalik biznesmenlarning chet eldagi musodara qilingan aktivlari bo‘lishi kerakligini qayd etgandi.
BMT Bosh assambleyasi 77-sessiyasi Nyu-Yorkda 13-sentabrda ochiladi. Umumiy muzokaralar 20—26-sentabrda bo‘lib o‘tadi.
Izoh (0)