Suriyada “Kotiba at-Tavhid val-Jihod” tashkiloti yetakchisi Sirojiddin Muxtorov o‘ldirildi, bu haqda Rossiyaning Suriyada dushman tomonlarni yarashtirish markazi rahbari o‘rinbosari general-mayor Oleg Yegorov ma’lum qildi, deb yozadi Meduza.
Yegorovning so‘zlariga ko‘ra, Muxtorov 8-sentabr kuni Rossiya Havo-kosmik kuchlari tomonidan Idlib viloyatidagi jangarilar lageriga berilgan zarba oqibatida halok bo‘lgan. Shuningdek, yana bir terrorchilik tashkiloti — “Jibhot an-Nusra”ning 20 dan ortiq yuqori mansabli a’zolari ham o‘ldirilgan.
“Kotiba at-Tavhid val-Jihod”, BMT ma’lumotlariga ko‘ra, “Al-Qoida” guruhiga aloqador bo‘lib, Suriyadagi Hama, Idlib va Latakiya viloyatlarida faoliyat olib boradi. Uning tarkibida 500 ga yaqin jangari bor.
Rossiya maxsus xizmatlari va tergov organlari talqini bo‘yicha, “Kotiba at-Tavhid val-Jihod” 2017-yilda Sankt-Peterburg metrosida yuz berib, 15 kishining o‘limiga va 100 ga yaqin odamning jabrlanishiga sabab bo‘lgan teraktni tashkillashtirishga aloqadordir. Teraktga, go‘yoki, Rossiyaning Suriyadagi jangovar harakatlari sabab bo‘lgan.
Tergov Sirojiddin Muxtorovni terakt buyurtmachisi deb atagandi. U Qirg‘izistonda tug‘ilib-o‘sib, keyin Suriyaga ketgan. U yerda “Kotiba at-Tavhid val-Jihod” guruhi tuzilgan, u o‘z oldiga butunjahon shariat davlatini barpo etishni maqsad qilib qo‘ygan. Rossiya tergov organlariga ko‘ra, u Qirg‘iziston, O‘zbekiston va Tojikiston fuqarolarini o‘z ichiga olgan.
Ularning talqini bo‘yicha, Peterburg metrosida bomba portlatgan xudkush Akbarjon Jalilov “Kotiba at-Tavhid val-Jihod” guruhi a’zosi bo‘lgan. Jalilovga teraktni tayyorlashda yordam bergan, ish bo‘yicha ayblanuvchilar ham ushbu guruh ishtirokchilari deb atalgan. Ular (11 kishi) aybiga iqror bo‘lmadi va ko‘rsatmalarni qiynoqlar ostida berganini ma’lum qildi. Shunga qaramay, ularga 19 yildan butun umrgacha bo‘lgan muddatlar tayinlandi.
Peterburg metrosidagi portlashdan keyin bir necha hafta o‘tib, terakt uchun javobgarlikni “Kotiba al-Imom Shamil” guruhi o‘z zimmasiga olgani haqida ma’lumot paydo bo‘ldi, u, taxminlarga ko‘ra, “Al-Qoida” bilan bog‘liqdir. Ammo sud majlislarida bu tashkilot tilga olinmagan.
Mavzuga doir:
Izoh (0)