AQSHning 44-prezidenti Barak Obama “Eng yaxshi hikoyachi” nominatsiyasi bo‘yicha televizion “Emmi” mukofotiga sazovor bo‘ldi. Bu haqda mukofot tashkilotchilari xabar qilgan.
Obama Netflix’da namoyish etilgan “Dunyoning eng yaxshi milliy bog‘lari” nomli hujjatli filmda “Mo‘jizaviy dunyo” epizodidagi hikoyachi roli uchun mukofotlangan. Butun dunyodagi milliy bog‘lar aks etgan besh qismdan iborat shou Barak va Mishel Obamaning Higher Ground prodyuserlik kompaniyasi tomonidan yaratilgan.
“Eng yaxshi hikoyachi” nominatsiyasiga xususan, teleboshlovchi Devid Attenboro, aktrisa Lupita Niongo, ssenarist Karim Abdul-Jabbar va komik Valter Kamau Bell da’vogarlik qilgan.
Barak Obama “Emmi” mukofotini olgan ikkinchi AQSH prezidenti bo‘ldi. 1956-yilda AQShning 34-prezidenti Duayt Eyzenxauer ham maxsus “Emmi” olgandi.
Obama avvalroq “Otamning orzulari” va “Umid jasorati” memuar audiokitoblari uchun “Gremmi” mukofotini qo‘lga kiritgan edi.
Izoh (0)