Qozog‘istonda don narxi keskin tushdi. Shu paytgacha 3-navdagi bug‘doyning bir tonnasi uchun 150 ming tenge taklif qilingan bo‘lsa, hozirda bu narx 115–116 ming tengeni tashkil etmoqda.
Qayd etilishicha, narx o‘zgarishiga mamlakatda yig‘im-terim mavsumining boshlanishi va Rossiyadan arzonroq g‘allaning kelishi o‘z ta’sirini ko‘rsatgan.
“Lekin, menimcha, narx bundan buyon tushmaydi, aksincha, oshadi. Nega? Birinchidan, Qozog‘iston 10-sentabrdan boshlab don va un eksportiga cheklovlarni olib tashlaydi. Ikkinchidan, eshitishimizcha, 15-sentabrdan boshlab Qozog‘iston Rossiyadan avtomobil yo‘llari orqali g‘alla olib kirishni taqiqlamoqchi ekan. Bu to‘g‘rimi yoki noto‘g‘ri, bilmayman, lekin shunday yechim muhokama qilinayotganini eshitdim”, — deydi 2 ming gektar maydonda dehqonchilik qilayotgan Leonid Kromiadi.
Fermerlar donni avtomobil yo‘llari orqali olib kirishni taqiqlashni qo‘llab-quvvatlamoqda. Yuqori hosildorlik tufayli rossiyalik fermerlar bug‘doyni arzonroq narxda taklif qilishlari mumkin. Qozog‘istonga kontrabanda sifatida kirsa, undan ham arzonroq bo‘ladi. Aynan shu omil Qozog‘istonning ichki bozorida narxlar pasayishiga olib keladi.
“Uspenskoye nazorat-o‘tkazish punkti bizdan unchalik uzoq emas va biz har kuni Rossiyadan Qozog‘istonga g‘alla ortilgan 300–400 ta yuk mashinasi kirib kelayotganini ko‘ryapmiz. Tasavvur qiling, bizga arzonroq bo‘lgan qancha don keladi. Ular bilan raqobatlasha olmaymiz. Biz narxlarimizni tushirishga majbur bo‘lamiz”, — deydi Kromiadi.
Shunga qaramay, Leonid Kromiadi yangi yilga kelib bug‘doy narxi 140 ming tenge bo‘lishini taxmin qilmoqda. Uning fikricha, agar Qozog‘istondan eksport ochilsa, Rossiyadan avtomobil yo‘llari orqali g‘alla importi yopilsa, narxlar shu darajaga yetadi.
Izoh (0)