Камчаткада 8 нафар сайёҳ вулқонга чиқиш чоғида ҳалок бўлди

Россиянинг Камчатка ярим оролида Ключевская Сопка вулқонига чиқиш чоғида саккиз киши ҳалок бўлди, деб ёзади «РБК».

12 киши, шу жумладан, икки нафар гиддан иборат гуруҳ аъзолари ҳалок бўлган. Уларнинг тўққиз нафари аввалроқ 3300 метр баландликдан тепага кўтарилишни бошлаган, ҳодиса 4200 метр баландликда юз берган.

Ми-8 вертолёти қидирув-қутқарув отрядини Ключевская Сопка вулқонига 1663 метр баландликка чиқариб қўйган. 20 м/с тезликдаги шамол ҳамда вулқон ёнбағирларидан кўтарилаётган кул туфайли, вертолёт катта баландликка кўтарила олмаган.

Вертолётдан тушганидан кейин қутқарувчилар 3,3 минг метр баландликка, вулқоншунослар уйчасига қараб йўл олган, у ерга ярим тунга қадар етиб бориши кутилмоқда. Эртаси куни эса улар 4158 метр баландликка чиқиши керак бўлади.

30 август куни ўн нафар сайёҳ ва икки гиддан иборат гуруҳ Евросиёдаги энг баланд ҳаракатдаги вулқон — 4,8 минг метрлик Ключевская Сопкага чиқишни бошлаган.

2 сентябрь куни уларнинг тўққиз нафари 3,3 минг метр баландликдан кўтарила бошлаган, қолганлар эса лагерда қолган. Эртаси куни гидлардан бири қутқарувчилар билан боғланиб, беш нафар сайёҳ 4,2 минг метр баландликдаги вулқондан юмалаб кетиб, ҳалок бўлгани, яна бир гид оёғини синдириб олгани, бир киши эса ҳушсиз ҳолатда эканини маълум қилган.

Қутқарувчилар акклиматизация ўтиб, 4 сентябрь куни сайёҳлар ҳалок бўлган жойга етиб олиш учун 3,3 минг метр баландликка чиқиши керак эди, бироқ шамол туфайли вертолётни зарур жойга қўндиришга муваффақ бўлинмади.

5 сентябрь куни эрталаб Камчатка ўлкаси ҳукумати ҳалок бўлганлар сони саккиз кишига етганини маълум қилди.

Тергов қўмитаси эҳтиётсизлик туфайли икки ёки ундан ортиқ шахснинг ўлимини келтириб чиқариш ҳақидаги модда бўйича жиноят иши қўзғади. Ушбу иш бўйича ким судланишига аниқлик киритилмаган.