Shotlandiya rahbari agar Trass bosh vazirga aylansa, Britaniya uchun falokat bo‘lishini aytdi

Liz Trass agar mamlakatni o‘z saylovoldi kampaniyasini olib borgandek boshqarsa, uning bosh vazir bo‘lishi Buyuk Britaniya uchun falokat bo‘ladi, dedi Shotlandiya birinchi vaziri Nikola Stirjen. Shu bilan birga, u Britaniya hukumatining yangi rahbari bilan konstruktiv munosabatlarga umid bildirdi.

“Agar u yozgi saylovoldi kampaniyasi kabi mamlakatni boshqarsa, bu nafaqat Shotlandiya uchun, balki butun Buyuk Britaniya uchun falokat bo‘ladi”, — deya Stirjenning so‘zlaridan iqtibos keltirgan Independent nashri.

Shotlandiya rahbarining so‘zlariga ko‘ra, saylov kampaniyasi davomida Trass konservativ partiya a’zolarining “ustuvorliklari”ga, ya’ni soliqlarni kamaytirish masalasiga e’tibor qaratgan. “Konservativ partiyaning oz sonli a’zolariga xiralik qilish mamlakat uchun to‘g‘ri ustuvorlik emas”, — dedi u.

Sterjen Trass bilan siyosiy masalalarda kelishmovchiliklari borligini ta’kidladi, ammo u har qanday yangi bosh vazirga o‘zini ko‘rsatish imkoniyati berilishi kerakligini aytdi. Britaniya uchun jiddiy davr keldi va mamlakatga nihoyatda jiddiy va maqsadli rahbarlik kerak, deya qo‘shimcha qildi Shotlandiya rahbari.

Trass Moliya vazirligining sobiq kansleri Rishi Sunak bilan birga bosh vazirlik uchun saylovlarning yakuniy bosqichiga chiqdi. G‘olib konservatorlar rahbari va Buyuk Britaniyaning yangi bosh vaziriga aylanadi. Yangi bosh vazir kim bo‘lishi 5-sentabr kuni ma’lum qilinadi.