Kamchatkadagi ekologik inqiroz oxirgi kunlarda eng ko‘p muhokama qilinayotgan mavzulardan biriga aylangan. Ijtimoiy tarmoqlarda Tinch okeani sohillariga chiqib qolgan dengiz jonivorlari murdalarining suratlari keng muhokama qilinmoqda. “Kommersant”ning yozishicha, vaziyat hudud ma’muriyati, Rossiya bosh prokuraturasi hamda mamlakat Tergov qo‘mitasi tomonidan nazoratga olingan.
Deyarli 40 kilometrlik sohilga dengiz jonivorlarining jasadlari chiqib qolgan: dengiz yulduzlari, baliqlar, sakkizoyoqlar, nerplar.
Foto: “RIA Novosti”
“Grinpis Rossi”ning ma’lum qilishicha, katta ekologik ifloslanish kuzatilgan va uning qamrovi hali ham aniqlangani yo‘q. Mahalliy aholi ushbu zararlanishga harbiy o‘quv mashg‘ulotlari yoki shu yaqin atrofdagi harbiy poligon sabab bo‘lgan, deb hisoblamoqda.
Foto: “RIA Novosti”
Dengiz hayvonlarining ommaviy ravishda halok bo‘lishi Kurill orollarida ham kuzatilgan. Sohilga ko‘plab dengiz jonivorlari chiqib qolgan.
Foto: Instagram / vv_solodov
Kamchatka o‘lkasi gubernatori Vladimir Solodov suvning ifloslanganini yashirgan yoki bu boradagi vaziyatga parvo qilmagan amaldorlarga chora ko‘rmoqchi.
Foto: Instagram / vv_solodov
Mutaxassislar suvdan namunalar olgan. Neft mahsulotining me’yori 3,6 baravarga oshib ketgani va fenol miqdori ham 2,5 baravarga ko‘paygani aniqlangan.
Foto: “TASS”
4-oktabrda Tinch okeanining Kamchatka sohili yaqinidan olingan suv, tuproq va halok bo‘lgan hayvon hamda mollyuskalarning tanasidan olingan namunalar Moskvaga yuborilgan. Yuk Rossiya toksikologiya, kimyo va biologiya markazlariga topshiriladi.
Foto: “RIA Novosti”
Harbiylar sodir bo‘lgan voqealarga aloqadorliklari borligini inkor etgan. Tinch okeani floti yoz boshidan buyon Radigino poligonida og‘ir jangovar texnikalar ishtirokidagi o‘quv mashg‘ulotlari o‘tkazilmaganini bildirgan.
Foto: “TASS”
Kamchatka ma’muriyati kimyoviy tadqiqotlar natijalari yaqin vaqt ichida e’lon qilinishini ma’lum qilgan. Tergov qo‘mitasi dengiz hayvonlarining ommaviy ravishda nobud bo‘lgani yuzasidan tekshirish o‘tkazishni boshlagan.
Foto: Instagram / _svetlana_radionova_
Sun’iy yo‘ldoshdan olingan suratlarga ko‘ra zaharli moddalar okeanga daryo orqali kelgan va dastlabki oqim 9-sentabrda kuzatilgan.
Foto: Instagram / yola_la
Kamchatka qirg‘oqlari yaqinidagi suv juda yomon ifloslangan.
Foto: Istagram / lefffu
