Kaliforniya shimolidagi Siskiyou okrugida yuz bergan katta yong‘in tufayli minglab odamlar evakuatsiya qilindi. Bir necha kishi yaralandi, uylar vayron bo‘ldi. O‘t o‘chiruvchilar shtat janubidagi yong‘inlar bilan ham kurashmoqda, deb yozadi Euronews telekanali.
Kaliforniyada haddan tashqari issiq ob-havo qayd etildi, mintaqa qurg‘oqchilikdan aziyat chekmoqda. Ayrim hududlarda havo harorati Selsiy bo‘yicha 45 darajaga yetadi.
Los-Anjelesning kambag‘al tumanlarida rasmiylar mahalliy aholi issiqda salqinlashi va suv ichishi mumkin bo‘lgan maxsus markazlar ochdi.
“Uyimizda konditsioner yo‘q, faqat ventilyator bor. Uyda o‘tirib bo‘lmagani uchun bu yerga keldik”, — deydi mahalliy fuqarolardan biri.
“Havo harorati juda qizib ketganda, biz Milliy ob-havo xizmati bilan kelishgan holda oldindan tayyorlangan chora-tadbirlarni amalga oshiramiz, qutqaruv guruhlarini to‘playmiz, kerakli narsalarni olib kelamiz, barcha markazlarning tayyorligini tekshiramiz, ularning soni yetarli”, — deydi Favqulodda vaziyatlar bo‘limi vakili Jozef Rayzer.
Kaliforniyaliklardan elektr toki uzilishining oldini olish uchun elektr energiyasini kamroq iste’mol qilish so‘raldi. Rekord issiqlik to‘lqini yana bir necha kun davom etishi aytilmoqda.
Izoh (0)