Shri-Lankaning sobiq prezidenti, norozilik namoyishlari munosabati bilan mamlakatni tark etgan Gotabaya Rajapaksa orolga qaytdi, deb xabar beradi Ada Derana.
Rajapaksa 12-iyul kuni rafiqasi Ioma va ikki xavfsizlik xodimi bilan harbiy samolyotda Maldiv orollariga uchib ketgan edi. Keyinroq Shri-Lanka havo kuchlari siyosatchining ketishi uchun amaldagi hukumat talabiga binoan harbiy samolyot taqdim etganini tasdiqladi.
Ikki kundan so‘ng sobiq prezident Saudi Airlines reysi bilan Singapurga yo‘l olgan, deya xabar beradi agentlik. Singapur hukumati uning yashash uchun ruxsatnomasini uzaytirgan, biroq bu muddat 11-avgustda tugagan. Singapur hukumatining tushuntirishicha, Rajapaksa mamlakatda shaxsiy tashrif bilan bo‘lgan va unga boshpana berilmagan. Singapurda bo‘lgan vaqtda Rajapaksa iste’foga chiqish haqida ariza bergandi.
So‘ng sobiq prezident vaqtinchalik boshpana so‘rab Tailandga uchib ketgan. Tailand tashqi ishlar vaziri Don Pramudvinay Rajapaksa diplomatik pasportga ega bo‘lgani uchun Tailandda 90 kun qolishi mumkinligini ma’lum qilgan.
Shri-Lankadagi tartibsizliklar 9-iyul kuni, namoyishchilar prezident qarorgohiga bostirib kirib, keyinroq o‘sha paytdagi bosh vazir Ranil Vikramasingxening uyiga o‘t qo‘yishi bilan avjiga chiqqan edi. Namoyishlar iqtisodiy inqiroz tufayli bahordan buyon davom etayotgandi.
15-iyulda Rajapaksa iste’foga chiqqanidan so‘ng Vikramasingxe prezident vazifasini bajaruvchi bo‘ldi. U davom etayotgan namoyishlar tufayli ikki marta favqulodda holat va komendantlik soati joriy qilgan. Rajapaksa muddati tugamasdan nafaqaga chiqqani sababli, yangi prezidentni parlament saylagan. 20-iyul kuni Vikramasingxe nomzodi uchun 225 deputatdan 134 nafari ovoz berdi. U 2024-yilgacha, ya’ni mamlakatda yangi xalq saylovlari o‘tkazilgunga qadar ushbu lavozimda qoladi.
Izoh (0)