MAGATE rahbari otishmalar natijasida Zaporojye AES binolariga zarar yetganini ma’lum qildi

Zaporojye AES binolariga otishmalar natijasida zarar yetkazilgan, dedi Xalqaro atom agentligi (MAGATE) rahbari Rafael Grossi jurnalistlarning savollariga javob berayotib.

“Atom stansiyasi, uning moddiy qobig‘i bir nechta joydan vayron bo‘lgani aniq-ravshan. Bu tasodifan bo‘lganmi, ataylab qilinganmi — buni aniqlay olmaymiz. Ammo bu haqiqat”, — dedi Grossi.

Uning so‘zlariga ko‘ra, ikkala tomon qanday siyosiy qarashlarga ega bo‘lishidan qat’i nazar, stansiya vayron bo‘lishda davom etmasligi kerak.

MAGATE ekspertlari stansiyaning holati haqida ko‘proq texnik ma’lumot yig‘ish va inspeksiya haqida hisobot tayyorlash uchun u yerda 4—5-sentabrgacha qoladi. “Shundan keyin biz MAGATEning stansiyadagi doimiy vakolatxonasimi, shunga o‘xshash biron narsa tashkil qilmoqchimiz, ekspertlar bizga stansiyada bo‘layotgan voqealar haqida muntazam ravishda xolisona hisobot berib turishlari uchun”, — dedi Grossi.

Avvalroq Ukraina prezidenti Vladimir Zelenskiy Rossiya Zaporojye AESga MAGATE missiyasi bilan birga kirmoqchi bo‘lgan mustaqil jurnalistlarni qo‘ymaganini ma’lum qilgandi.

1-sentabr kuni urushning ilk kunlaridanoq Rossiya harbiylari nazorati ostida bo‘lib turgan Zaporojye AESga Xalqaro atom energiyasi agentligi (MAGATE) missiyasi yetib keldi, u Yevropaning eng yirik atom elektr stansiyasida vaziyatni baholashi kerak. Stansiyaning ko‘zdan kechirilishi aks etgan lavhalar Rossiya davlat agentliklari tomonidan e’lon qilindi.

Stansiya tashkilot tomonidan ko‘zdan kechirilganidan keyin, uning rahbari Rafael Grossi missiyaning bir nechta a’zolari u yerda qolib ishni davom ettirishini ma’lum qildi.

MAGATE missiyasi tashrifidan oldin Rossiya Mudofaa vazirligi Ukrainani stansiyani egallab olishga urinishda ayblagandi.

ZAES va Energodar shahri muntazam ravishda o‘qqa tutilib keladi. Ukraina va Rossiya buni bir-biriga to‘nkaydi. AESning ukrainalik xodimlari Rossiya xavfsizlik kuchlari ularni hibsga olib, qiynoqlarga solgani va MAGATE inspektorlaridan stansiya xavfsizligi uchun risklarni yashirishni talab qilgani haqida jurnalistlarga so‘zlab bergan.