AQSH prezidenti Jo Bayden amerikaliklarga yo‘llagan murojaatida o‘zidan avvalgi davlat rahbari Donald Tramp va uning tarafdorlarini “mamlakat uchun tahdid” deb atadi. Bu haqda Meduza xabar bermoqda.
“Donald Tramp va MAGA-respublikachilar (MAGA — Make America Great Again (Amerikani yana buyuk qilamiz) — Donald Tramp va tarafdorlarining shiori) mamlakatimizning negiziga xavf soladigan ekstremizm timsolidir”, — dedi u.
Baydenning fikricha, Trampning tarafdorlari 2020-yilgi prezident saylovi yakunlarini tan olmasdan, “konstitutsiyani hurmat qilmaydi va qonun ustuvorligiga ishonmaydi”, shuningdek, mamlakatni o‘tmishga, “tanlash huquqi bo‘lmagan, shaxsiy hayot huquqi bo‘lmagan, kontratsepsiya huquqi bo‘lmagan, o‘zing sevgan inson bilan turmush qurish huquqi bo‘lmagan” davrlarga qaytarishga urinmoqda.
Shuningdek, AQSH prezidenti aytishicha, Tramp tarafdorlari orasidagi taniqli insonlar deyarli ommaviy tartibsizliklarga da’vat etmoqda. “Amerikada siyosiy zo‘ravonlikka o‘rin yo‘q. Nuqta”, — dedi u.
Bayden qayd etishicha, aytilgan gaplar respublikachilarning hammasiga ham tegishli emas, biroq Tramp va uning tarafdorlari Respublikachilar partiyasida ustunlikni qo‘lga kiritgan va ularni “qo‘rqitib qo‘ygan”, dedi u.
Respublikachilar partiyasi prezidentni nutqi uchun tanqid qildi va uni jamiyat orasiga nifoq solishda aybladi.
Politico Baydenning nutqini butun prezidentligi davridagi eng keskinlaridan biri deb atadi. Nashr uning chiqishini noyabrda bo‘lib o‘tadigan Kongressga saylovlar uchun “stavkalarni belgilab olish”ga urinish deb talqin qildi. The New York Times yozishicha, Baydenning jamoasi saylovni amaldagi prezident dasturi va Tramp tarafdorlarining ekstremizmi o‘rtasidagi “hayotiy muhim tanlov” deb taqdim etmoqchi.
AQSH sobiq prezidenti Donald Tramp Amerika siyosatidagi eng ta’siri kuchli shaxs bo‘lib qolmoqda; Amerika OAVlari yozishicha, uning qo‘llab-quvvatlashi Respublikachilar praymerizda hozirgacha ham hal qiluvchi ahamiyatga ega. So‘nggi haftalarda FQB uning uyida o‘tkazgan tintuvlar va ehtimoliy jinoiy ta’qib tufayli Trampning ismi yangiliklarda tez-tez tilga olinmoqda.
Izoh (0)