Шри-Ланканинг собиқ президенти, норозилик намойишлари муносабати билан мамлакатни тарк этган Готабая Ражапакса оролга қайтди, деб хабар беради Ада Дерана.
Ражапакса 12 июль куни рафиқаси Иома ва икки хавфсизлик ходими билан ҳарбий самолётда Мальдив оролларига учиб кетган эди. Кейинроқ Шри-Ланка ҳаво кучлари сиёсатчининг кетиши учун амалдаги ҳукумат талабига биноан ҳарбий самолёт тақдим этганини тасдиқлади.
Икки кундан сўнг собиқ президент Сауди Airlines рейси билан Сингапурга йўл олган, дея хабар беради агентлик. Сингапур ҳукумати унинг яшаш учун рухсатномасини узайтирган, бироқ бу муддат 11 августда тугаган. Сингапур ҳукуматининг тушунтиришича, Ражапакса мамлакатда шахсий ташриф билан бўлган ва унга бошпана берилмаган. Сингапурда бўлган вақтда Ражапакса истеъфога чиқиш ҳақида ариза берганди.
Сўнг собиқ президент вақтинчалик бошпана сўраб Таиландга учиб кетган. Таиланд ташқи ишлар вазири Дон Прамудвинай Ражапакса дипломатик паспортга эга бўлгани учун Таиландда 90 кун қолиши мумкинлигини маълум қилган.
Шри-Ланкадаги тартибсизликлар 9 июль куни, намойишчилар президент қароргоҳига бостириб кириб, кейинроқ ўша пайтдаги бош вазир Ранил Викрамасингхенинг уйига ўт қўйиши билан авжига чиққан эди. Намойишлар иқтисодий инқироз туфайли баҳордан буён давом этаётганди.
15 июлда Ражапакса истеъфога чиққанидан сўнг Викрамасингхе президент вазифасини бажарувчи бўлди. У давом этаётган намойишлар туфайли икки марта фавқулодда ҳолат ва комендантлик соати жорий қилган. Ражапакса муддати тугамасдан нафақага чиққани сабабли, янги президентни парламент сайлаган. 20 июль куни Викрамасингхе номзоди учун 225 депутатдан 134 нафари овоз берди. У 2024 йилгача, яъни мамлакатда янги халқ сайловлари ўтказилгунга қадар ушбу лавозимда қолади.
Изоҳ (0)