Gollivuding taniqli aktyori Jonni Depp musiqiy taqdirlash marosimida MTV VMA mukofotining ramzi — Oy odami obrazida paydo bo‘ldi, deb yozadi “Kino.mail.ru”.
59 yoshli aktyor AQSHning Nyuark shahridagi Prudenshal markazi sport majmuasi sahnasi tepasida gologramma — skafandr kiygan odam ko‘rinishida paydo bo‘ldi. U sahna tepasida parvoz qilib, unga pul kerak bo‘lganini aytdi. “Bilasizmi? Menga ish kerak edi”, — dedi aktyor.
Keyinchalik Depp yana bir bor Oy odami qiyofasida paydo bo‘ldi. “Bolalar, men tug‘ilgan kun, to‘y, turli xil marosimlar — nimani xohlasangiz, qila olaman. Men yana tish shifokoriman”, — deya hazil qildi aktyor.
2022-yilda Jonni Depp hech qaysi nominatsiya bo‘yicha mukofotga nomzod bo‘lmadi. Biroq o‘tgan yillar mobaynida u “Eng yaxshi aktyor” va “Eng yaxshi salbiy rol ijrochisi” nominatsiyalari bo‘yicha beshta “Oy odami” haykalchasini qo‘lga kiritgan. Aktyorning kutilmagan obrazda marosimda ishtirok etishi atigi bir hafta oldin ma’lum bo‘lgan.