Toshkent hayvonot bog‘ida Alatau laqabli 9 yoshli jirafa 20-avgust kuni vafot etdi. Bu haqda bog‘ axborot xizmati ma’lum qildi.
Ma’lum qilinishicha, so‘nggi hafta davomida Alatauning ishtahasi pasayib borayotgani kuzatilgan va u tez orada vazn yo‘qotishni boshlagan. Hayvonot bog‘i veterinariya mutaxassislari jirafaning ovqat hazm qilish jarayonini yaxshilash uchun simptomatik davolashni boshlagan. Ammo ichak parazitlari mavjudligini tekshirish bo’yicha o‘tkazilgan koprologik ko‘rik salbiy natija bergan. Veterinar va kiperlarning sa’y-harakatlariga qaramasdan jirafa 20-avgust kuni tunda vafot etgan.
Ayni damda Davlat veterinariya bo‘limi vakillari ishtirokida jonivorni yorib ko‘rish jarayoni o‘tkazilmoqda. Barcha zarur patologoanatomik materiallar Hayvonlar kasalliklariga qarshi kurashish bo‘yicha davlat veterinariya markazi laboratoriyasiga yuboriladi.
Barcha laboratoriya tahlillari natijalari olingandan keyin yakuniy tashxis qo‘yiladi va jonivor nega vafot etgani sababi aniqlanadi, — deb izoh berdi Yunusobod tumani veterinariya va chorvachilikni rivojlantirish bo‘limi boshlig‘i Shavkat Gabdulxakov.Ma’lumot uchun, Alatau 2016-yilda 3 yoshligida Olmaota hayvonot bog‘idan olib kelingan edi.
Izoh (0)