Тошкент ҳайвонот боғида Алатау лақабли 9 ёшли жирафа 20 август куни вафот этди. Бу ҳақда боғ ахборот хизмати маълум қилди.
Маълум қилинишича, сўнгги ҳафта давомида Алатаунинг иштаҳаси пасайиб бораётгани кузатилган ва у тез орада вазн йўқотишни бошлаган. Ҳайвонот боғи ветеринария мутахассислари жирафанинг овқат ҳазм қилиш жараёнини яхшилаш учун симптоматик даволашни бошлаган. Аммо ичак паразитлари мавжудлигини текшириш бўйича ўтказилган копрологик кўрик салбий натижа берган. Ветеринар ва киперларнинг саъй-ҳаракатларига қарамасдан жирафа 20 август куни тунда вафот этган.
Айни дамда Давлат ветеринария бўлими вакиллари иштирокида жониворни ёриб кўриш жараёни ўтказилмоқда. Барча зарур патологоанатомик материаллар Ҳайвонлар касалликларига қарши курашиш бўйича давлат ветеринария маркази лабораториясига юборилади.
Барча лаборатория таҳлиллари натижалари олингандан кейин якуний ташхис қўйилади ва жонивор нега вафот этгани сабаби аниқланади, — деб изоҳ берди Юнусобод тумани ветеринария ва чорвачиликни ривожлантириш бўлими бошлиғи Шавкат Габдулхаков.Маълумот учун, Алатау 2016 йилда 3 ёшлигида Олмаота ҳайвонот боғидан олиб келинган эди.
Изоҳ (0)