10-avgust kuni poytaxtimizda BMT Taraqqiyot dasturi (BMTTD), O‘zbekiston Respublikasi Gidrometeorologiya xizmati markazi (“O‘zgidromet”) bilan hamkorlikda Farg‘ona vodiysida o‘tkazilgan tadqiqot natijalarini muhokama qilish va davlat idoralari xodimlarining iqlim o‘zgarishi bilan bog‘liq xavf va tahdidlar to‘g‘risida xabardorligini oshirish bo‘yicha tadbir tashkil etildi. Bu haqda BMTTD “Daryo”ga ma’lum qildi.
Qayd etilishicha, yig‘ilishda soha mutaxassislari tomonidan iqlim o‘zgarishi oqibatida yuzaga keladigan xavf va tahdidlar bo‘yicha o‘tkazilgan so‘rovnoma natijalari taqdim etilgan. Ijtimoiy tadqiqot natijasida Farg‘ona vodiysida faoliyat olib boruvchi soha vakillarining iqlim o‘zgarishiga bilan bog‘liq xavflar, tabiiy ofatlar va tegishli moslashuv choralari o‘rtasidagi o‘zaro bog‘liqlik bo‘yicha xabardorligi yetarli darajada emasligi ta’kidlangan (respondentlarning 20 foizi iqlim o‘zgarishi xavflaridan xabardor ekanligini tasdiqlashgan). Xususan, Farg‘ona vodiysi respublikadagi aholi eng zich joylashgan va tabiiy resurslardan foydalanish bo‘yicha intensivligi yuqori ekanligi tufayli iqlim o‘zgarishi jarayonlariga beqaror ekanligi qayd etilgan.
Tadbir ishtirokchilari Farg‘ona vodiysida iqlim o‘zgarishi oqibatlarini yumshatish va ularga moslashish bo‘yicha tizimli chora-tadbirlarni qabul qilish muhim ahamiyat kasb etishini ta’kidlagan. So‘rovnomada ishtirok etgan 92 foiz respondentlar iqlim o‘zgarishi inson salomatligiga, ayniqsa, ayollar turmush darajasiga salbiy ta’sir ko‘rsatishini aytib o‘tishgan.
Tadbir davomida ishtirokchilar (30—35 foiz ayollar) Farg‘ona vodiysida iqlim o‘zgarishiga moslashish va uning oqibatlarini yumshatish bo‘yicha hamkorlikdagi yangi yondashuvlar, g‘oyalar va tashabbuslar yuzasidan fikr va tajriba almashgan. Tadbir yakunida qaror qabul qiluvchilar va o‘rta bo‘g‘indagi tarmoq mutaxassislarining iqlim o‘zgarishi oqibatida yuzaga kelishi mumkin bo‘lgan xavf va tahdidlar to‘g‘risida tushunchasi va xabardorligini oshirish maqsadida loyiha doirasida amalga oshirilishi ko‘zda tutilgan chora-tadbirlar rejasi ishlab chiqilgan.
Ma’lumot uchun: Yevropa Ittifoqining moliyaviy ko‘magida BMT Taraqqiyot Dasturi tomonidan “Markaziy Osiyoda iqlim o‘zgarishi va barqarorlik” mintaqaviy loyihasi amalga oshirilmoqda. Loyihaning umumiy maqsadi Farg‘ona vodiysining, O‘zbekiston, Qirg‘iziston va Tojikiston Respublikalari bilan chegaradosh hududlarda barqarorlikni ta’minlash va iqlim o‘zgarishiga chidamli rivojlanish modellarini qo‘llab-quvvatlashdan iborat.
Izoh (0)