10 август куни пойтахтимизда БМТ Тараққиёт дастури (БМТТД), Ўзбекистон Республикаси Гидрометеорология хизмати маркази («Ўзгидромет») билан ҳамкорликда Фарғона водийсида ўтказилган тадқиқот натижаларини муҳокама қилиш ва давлат идоралари ходимларининг иқлим ўзгариши билан боғлиқ хавф ва таҳдидлар тўғрисида хабардорлигини ошириш бўйича тадбир ташкил этилди. Бу ҳақда БМТТД «Дарё»га маълум қилди.
Қайд этилишича, йиғилишда соҳа мутахассислари томонидан иқлим ўзгариши оқибатида юзага келадиган хавф ва таҳдидлар бўйича ўтказилган сўровнома натижалари тақдим этилган. Ижтимоий тадқиқот натижасида Фарғона водийсида фаолият олиб борувчи соҳа вакилларининг иқлим ўзгаришига билан боғлиқ хавфлар, табиий офатлар ва тегишли мослашув чоралари ўртасидаги ўзаро боғлиқлик бўйича хабардорлиги етарли даражада эмаслиги таъкидланган (респондентларнинг 20 фоизи иқлим ўзгариши хавфларидан хабардор эканлигини тасдиқлашган). Хусусан, Фарғона водийси республикадаги аҳоли энг зич жойлашган ва табиий ресурслардан фойдаланиш бўйича интенсивлиги юқори эканлиги туфайли иқлим ўзгариши жараёнларига беқарор эканлиги қайд этилган.
Тадбир иштирокчилари Фарғона водийсида иқлим ўзгариши оқибатларини юмшатиш ва уларга мослашиш бўйича тизимли чора-тадбирларни қабул қилиш муҳим аҳамият касб этишини таъкидлаган. Сўровномада иштирок этган 92 фоиз респондентлар иқлим ўзгариши инсон саломатлигига, айниқса, аёллар турмуш даражасига салбий таъсир кўрсатишини айтиб ўтишган.
Тадбир давомида иштирокчилар (30—35 фоиз аёллар) Фарғона водийсида иқлим ўзгаришига мослашиш ва унинг оқибатларини юмшатиш бўйича ҳамкорликдаги янги ёндашувлар, ғоялар ва ташаббуслар юзасидан фикр ва тажриба алмашган. Тадбир якунида қарор қабул қилувчилар ва ўрта бўғиндаги тармоқ мутахассисларининг иқлим ўзгариши оқибатида юзага келиши мумкин бўлган хавф ва таҳдидлар тўғрисида тушунчаси ва хабардорлигини ошириш мақсадида лойиҳа доирасида амалга оширилиши кўзда тутилган чора-тадбирлар режаси ишлаб чиқилган.
Маълумот учун: Европа Иттифоқининг молиявий кўмагида БМТ Тараққиёт Дастури томонидан «Марказий Осиёда иқлим ўзгариши ва барқарорлик» минтақавий лойиҳаси амалга оширилмоқда. Лойиҳанинг умумий мақсади Фарғона водийсининг, Ўзбекистон, Қирғизистон ва Тожикистон Республикалари билан чегарадош ҳудудларда барқарорликни таъминлаш ва иқлим ўзгаришига чидамли ривожланиш моделларини қўллаб-қувватлашдан иборат.
Изоҳ (0)