AOKAda o‘tkazilgan brifingda Ta’lim sifatini nazorat qilish davlat inspeksiyasi axborot xizmati rahbari Shavkat Xo‘jaqulov oliy ta’lim muassasalari milliy reytingini aniqlash uchun ish beruvchilar o‘rtasida o‘tkaziladigan so‘rovnoma xususida ma’lumot berdi.
Qayd etilishicha, milliy reyting uchun baholash ko‘rsatkichlarini shakllantirishda xalqaro e’tirof etilgan agentliklar indikatorlaridan ham foydalanish orqali ularning kelgusida xalqaro reytinglardan o‘rin olishlarini ta’minlash maqsad qilingan. Joriy yilgi reytingda 92 ta oliy ta’lim muassasasi, shu jumladan 23 ta filial ishtirok etmoqda.
Milliy reyting tizimi 20 ta baholovchi indikatorni o‘z ichiga oladi. Shu jumladan ish beruvchilarning bitiruvchilar haqidagi fikri reytingdagi eng muhim indikatorlardan biri hisoblanadi.
Reyting joriy qilingan dastlabki yillarda Ta’lim inspeksiyasining rasmiy veb-saytiga joylashtirilgan maxsus elektron portal orqali so‘rovnomada ixtiyoriy ravishda kirib qatnashish mumkin edi. Joriy yilda tashkil qilinadigan onlayn so‘rovnoma avvalgisidan farqli tarzda survey.tdi.uz sayti orqali real vaqt rejimida amalga oshiriladi va bunda ish beruvchi idora yoki tashkilotlar o‘zlarining elektron raqamli imzo orqali tizimga kiradilar va so‘rovnoma to‘ldirishadi.
Ish beruvchilarning ortiqcha vaqtini olmaslik va so‘rovnomada qatnashishi samarali bo‘lishi uchun oliy ta’lim muassasalari sohalarga bo‘lib chiqilgan. Har bir ish beruvchi idora faoliyat yo‘nalishiga qarab oliy ta’lim muassasalari sohalari bilan biriktirildi.
Ish beruvchilarga bitta oliy ta’lim muassasasiga bir marta baho berish imkoniyati beriladi va barcha ma’lumotlar avtomatik tarzda maxsus elektron bazaga kelib tushadi.
Joriy yilgi so‘rovnomaga kamida 50 nafar xodimi bo‘lgan 16000 tadan ortiq idoralar, shu jumladan, xususiy tashkilotlar ham jalb qilinishi rejalashtirilgan.
So‘rovnoma shu yilning 15-avgustiga qadar davom etadi va uning natijalari joriy yilda oliy ta’lim muassasalari milliy reytingini aniqlashda inobatga olinadi.
Izoh (0)