АОКАда ўтказилган брифингда Таълим сифатини назорат қилиш давлат инспекцияси ахборот хизмати раҳбари Шавкат Хўжақулов олий таълим муассасалари миллий рейтингини аниқлаш учун иш берувчилар ўртасида ўтказиладиган сўровнома хусусида маълумот берди.
Қайд этилишича, миллий рейтинг учун баҳолаш кўрсаткичларини шакллантиришда халқаро эътироф этилган агентликлар индикаторларидан ҳам фойдаланиш орқали уларнинг келгусида халқаро рейтинглардан ўрин олишларини таъминлаш мақсад қилинган. Жорий йилги рейтингда 92 та олий таълим муассасаси, шу жумладан 23 та филиал иштирок этмоқда.
Миллий рейтинг тизими 20 та баҳоловчи индикаторни ўз ичига олади. Шу жумладан иш берувчиларнинг битирувчилар ҳақидаги фикри рейтингдаги энг муҳим индикаторлардан бири ҳисобланади.
Рейтинг жорий қилинган дастлабки йилларда Таълим инспекциясининг расмий веб-сайтига жойлаштирилган махсус электрон портал орқали сўровномада ихтиёрий равишда кириб қатнашиш мумкин эди. Жорий йилда ташкил қилинадиган онлайн сўровнома аввалгисидан фарқли тарзда survey.tdi.uz сайти орқали реал вақт режимида амалга оширилади ва бунда иш берувчи идора ёки ташкилотлар ўзларининг электрон рақамли имзо орқали тизимга кирадилар ва сўровнома тўлдиришади.
Иш берувчиларнинг ортиқча вақтини олмаслик ва сўровномада қатнашиши самарали бўлиши учун олий таълим муассасалари соҳаларга бўлиб чиқилган. Ҳар бир иш берувчи идора фаолият йўналишига қараб олий таълим муассасалари соҳалари билан бириктирилди.
Иш берувчиларга битта олий таълим муассасасига бир марта баҳо бериш имконияти берилади ва барча маълумотлар автоматик тарзда махсус электрон базага келиб тушади.
Жорий йилги сўровномага камида 50 нафар ходими бўлган 16000 тадан ортиқ идоралар, шу жумладан, хусусий ташкилотлар ҳам жалб қилиниши режалаштирилган.
Сўровнома шу йилнинг 15 августига қадар давом этади ва унинг натижалари жорий йилда олий таълим муассасалари миллий рейтингини аниқлашда инобатга олинади.
Изоҳ (0)