Buxoro viloyatining G‘ijduvon tumanida radardan qochish uchun avtomobilining davlat raqamini almashtirgan haydovchi ushlandi. Bu haqda “Daryo”ga viloyat IIB YHXB axborot xizmati boshlig‘i, kapitan Ulug‘bek Shukrullayev xabar berdi.
Ta’kidlanishicha, G‘ijduvon tumanida yashovchi fuqaro J.J. ancha vaqtdan buyon foydalanmagan Vaz-21 011 “Jiguli” mashinasining 80 K 152 OA davlat raqam belgisini boshqaruvidagi Lacetti’ga o‘rnatgan.
Holat viloyat Yo‘l harakati xavfsizligi boshqarmasi, yo‘l-patrul xizmati otryadi hamda 3-safarbarlik inspektorlari guruhi tomonidan o‘tkazilgan nazorat tadbirida fosh bo‘lgan. Holat yuzasidan tegishli tartibda ma’muriy bayonnoma rasmiylashtirilib, avtomashina vaqtincha saqlash uchun jarima maydonchasiga keltirilgan.
“Haydovchi transport vositalari davlat raqam belgisini almashtirish qonunga xilofligini bila turib, bu ishga qo‘l urgan. U bu xatti-harakati bilan yo‘llarda joriy qilingan radarlardan davlat raqam belgisini noqonuniy o‘zgartirish bilan qutilishni o‘ylagan”, — deydi Ulug‘bek Shukrullayev.
Izoh (0)