O‘zbekistonda yil boshidan buyon qalbaki pul yasash va o‘tkazish bilan bog‘liq qancha jinoyat sodir etilgani ma’lum qilindi

O‘zbekistonda yil boshidan buyon qalbaki pul yasash va o‘tkazish bilan bog‘liq 23 ta jinoyat fosh etildi. Bu haqda Bosh prokuratura huzuridagi departament xabar berdi.

Ma’lum qilinishicha, 2022-yilning o‘tgan davrida xorijiy valyuta qimmatliklarini noqonuniy muomalaga kiritilishi bilan bog‘liq 245 ta qonunbuzarlik holati aniqlanib, natijasiga ko‘ra 167 ta jinoiy hamda 78 ta ma’muriy huquqbuzarlikka oid ishlar qo‘zg‘atilgan.

Huquqbuzarlardan davlat foydasiga 433,2 ming dollar, 1,1 million rubl, 702,2 ming qozoq tengesi va 1,2 milliard so‘m ashyoviy dalil sifatida olib qo‘yilgan.

Qalbaki pul yasash va o‘tkazish bilan bog‘liq 23 ta jinoyat fosh etilib, 135 million so‘mlik hamda 53,2 ming dollarlik qalbaki banknotlarni erkin muomalaga kiritilishining oldi olingan.

Qimmatbaho metallar va tabiiy qimmatbaho toshlarni qonunga xilof muomalasi bilan bog‘liq 8 ta jinoyat fosh etilib, huquqbuzarlardan 730,2 million so‘mlik 4,6 kilogramm qimmatbaho metallar va tabiiy qimmatbaho toshlar ashyoviy dalil sifatida olib qo‘yilgan.