Osiyo taraqqiyot banki ishtirokida “Toshkent viloyati shahar va tumanlarida ichimlik va oqova suv tizimlarini qurish va rekonstruksiya qilish (3-bosqich)” loyihasini amalga oshirish chora-tadbirlari to‘g‘risida prezident qarori imzolandi, deb xabar bermoqda Norma.
Hujjat Toshkent viloyatining Angren, Bekobod, Olmaliq, Ohangaron, Chirchiq va Yangiyo‘l shaharlarida hamda Chinoz tumani markazida aholi va tadbirkorlik subyektlarining ichimlik va oqova suv xizmatlari bilan ta’minlanganlik darajasini oshirish, ushbu hududlarning sanitariya-epidemiologik hamda ekologik holatini yanada yaxshilash, shuningdek, Osiyo taraqqiyot banki bilan hamkorlikni yanada kengaytirishga qaratilgan.
Loyihani amalga oshirish uchun OTB 5 yillik imtiyozli davrni o‘z ichiga olgan 25 yilda qaytarish sharti bilan 161 million dollar miqdorida mablag‘ ajratishni ma’qullagan.
Loyiha umumiy qiymati 185,8 million dollarni tashkil etadi. Shundan:
- OTB qarzi — 161 million dollarni;
- loyihani amalga oshirishda O‘zbekiston ulushi — qo‘shilgan qiymat solig‘ini qoplash va bojxona imtiyozlari shaklida 24,8 million dollarni tashkil etadi.
Toshkent viloyati hokimligi “O‘zsuvta’minot” AJ bilan birgalikda loyihaning sifatli amalga oshirilishi, belgilangan ko‘rsatkichlarga erishilishi va OTB qarzi qaytarilishi uchun javobgar hisoblanadi.
Izoh (0)