Shavkat Mirziyoyev 4-avgust kuni bo‘lib o‘tayotgan davlat xizmatini isloh qilish bo‘yicha videoselektor yig‘ilishida barcha vazirliklar ish uslubini o‘zgartirib, odamlarga xizmat sifatini oshirishi kerakligig haqida gapirdi.
Ta’kidlanishicha, bu borada litsenziya berish, oliygohlarga hujjat topshirish, kadastr hujjati, tug‘ilganlik guvohnomasi va xorijga chiqish pasportini olish, to‘lov tizimlari bo‘yicha aholiga qulayliklar yaratildi. Lekin hali ko‘p sohalarda qulayliklar yaratish lozimligi ko‘rsatib o‘tildi.
Jumladan, subsidiyalar uchun aholi va tadbirkorlar o‘rtacha 10 ta vazirlik va idoradan xulosa olishi kerak. Elektr tarmoqlariga ulanishda ham ortiqcha xarajat va byurokratiya ko‘p. Tibbiyotda qaysi xizmat bepul yoki pulli bo‘lishi, davlatdan beriladigan dorilarning hisob-kitobi va egasiga yetib borishi, ko‘p tumanlarda hali yechimini topgani yo‘q. Qurilish, transport, kommunal xo‘jaligi, standart, karantin idoralarida ham aholi va tadbirkorlarning ishi bitishi qiyin bo‘lgan jarayonlar juda ko‘pligi ko‘rsatib o‘tildi.
Shuning uchun bosh vazir oldiga bir oy muddatda:
- har bir vazirlik va hokimlikda aholi va tadbirkorlarga xizmat ko‘rsatish jarayonlarini tushunarli va qulay shaklga keltirish;
- ortiqcha xarajatlar va hujjatlarni qisqartirish;
- aholiga tez va sifatli xizmat ko‘rsatadigan sharoitlarni yaratish bo‘yicha “yo‘l xaritasi” ijrosini ta’minlash vazifasi qo‘yildi.
Mahallada bog‘cha, maktab, yo‘l qurish, suv va elektr tarmoqlarini tortib kelish ishlarida aholi faol ishtirok etadigan tizimlar yaratildi. “Ochiq budjet” doirasida o‘tgan 6 oyda aholi talabiga mos 2 mingdan ziyod ana shunday loyihalar boshlandi. Ularga 1,1 trillion so‘m yo‘naltirildi. Keyingi olti oyda bunday loyihalar uchun yana 1 trillion so‘m ajratish mo‘ljallangan.
“Eng muhimi, odamlar bunday loyihalarga o‘zlarini daxldor bilib, bunyod qilingan infratuzilmadan asrab-avaylab foydalanayapti”, — dedi Prezident. Mutasaddilarga aholi bilan bamaslahat qilinadigan loyihalar ko‘lamini kengaytirish bo‘yicha takliflar kiritish topshirildi.
Mavzuga doir:
- O‘zbekistonda mas’ullarga 3 oy muddatda “100 ta ilg‘or yetakchilar” dasturini boshlash vazifasi qo‘yildi
- Shavkat Mirziyoyev “rahbarlikka tasodifan kelib qolishning oldi olinadigan” tizimga o‘tilishini ma’lum qildi
- O‘zbekistonda o‘tgan 6 oyda bilim va ko‘nikmalari yetishmagani bois 37 nafar tuman va shahar hokimi almashtirildi
- “Har bir vazirlik va hokimlik kadrlar tanlashni oliygohlardan boshlashi zarur” — Shavkat Mirziyoyev
Izoh (0)