Осиё тараққиёт банки иштирокида «Тошкент вилояти шаҳар ва туманларида ичимлик ва оқова сув тизимларини қуриш ва реконструкция қилиш (3-босқич)» лойиҳасини амалга ошириш чора-тадбирлари тўғрисида президент қарори имзоланди, деб хабар бермоқда Норма.
Ҳужжат Тошкент вилоятининг Ангрен, Бекобод, Олмалиқ, Оҳангарон, Чирчиқ ва Янгийўл шаҳарларида ҳамда Чиноз тумани марказида аҳоли ва тадбиркорлик субъектларининг ичимлик ва оқова сув хизматлари билан таъминланганлик даражасини ошириш, ушбу ҳудудларнинг санитария-эпидемиологик ҳамда экологик ҳолатини янада яхшилаш, шунингдек, Осиё тараққиёт банки билан ҳамкорликни янада кенгайтиришга қаратилган.
Лойиҳани амалга ошириш учун ОТБ 5 йиллик имтиёзли даврни ўз ичига олган 25 йилда қайтариш шарти билан 161 миллион доллар миқдорида маблағ ажратишни маъқуллаган.
Лойиҳа умумий қиймати 185,8 миллион долларни ташкил этади. Шундан:
- ОТБ қарзи — 161 миллион долларни;
- лойиҳани амалга оширишда Ўзбекистон улуши — қўшилган қиймат солиғини қоплаш ва божхона имтиёзлари шаклида 24,8 миллион долларни ташкил этади.
Тошкент вилояти ҳокимлиги «Ўзсувтаъминот» АЖ билан биргаликда лойиҳанинг сифатли амалга оширилиши, белгиланган кўрсаткичларга эришилиши ва ОТБ қарзи қайтарилиши учун жавобгар ҳисобланади.
Изоҳ (0)