O‘zbekistonda 2022-yil 23—26-iyul kunlari oralig‘ida 6 ta oliy ta’lim muassasasining tegishli ta’lim yo‘nalishlariga o‘qishga kirish uchun o‘tkazilgan chet tilidan kasbiy (ijodiy) imtihon natijalari e’lon qilindi. Bu haqda Davlat test markazi xabar qildi.
Qayd etilishicha, imtihon natijalari my.dtm.uz saytida e’lon qilingan bo‘lib, imtihonda ishtirok etgan abituriyentlar shaxsiy kabinetidan (abituriyent qayd varaqasining yuqori qismida) o‘z natijalarini bilishlari mumkin.
Bunda abituriyentning har bir bo‘lim bo‘yicha to‘plagan ballari, jami ball, 120 ballga nisbatan foiz ko‘rsatkichi va oliy ta’lim muassasalariga kirishda chet tili fanidan beriladigan ball aks etgan.
Eslatma: o‘z natijasidan norozi bo‘lgan abituriyentlar 2022-yil 4—6-avgust kunlari my.dtm.uz sayti orqali apellatsiya shikoyati berishlari mumkin.
Belgilangan muddatdan so‘ng apellatsiya shikoyatlari qabul qilinmaydi va apellatsiya shikoyatlari qayta ko‘rib chiqilmaydi.
Izoh (0)