Latviya gaz-transport tizimi operatori Latvijas gaze Rossiyadan tabiiy gaz sotib olishni qayta tikladi, deb yozadi Meduza.
Kompaniya rahbari Aygars Kalvitis ma’lum qilishicha, xaridlar to‘g‘ridan to‘g‘ri “Gazprom”dan emas, balki vositachi orqali yevroda amalga oshirilmoqda. U yetkazib beruvchining nomini oshkor qilishdan bosh tortdi va bu “tijorat axboroti” ekanini pesh qildi.
Ukrainada urush boshlangach, Rossiya gazini Latviyaga yetkazib berish bir necha marta uzib qo‘yilgan va to‘xtatilgan, biroq iyun o‘rtalaridan yetkazib berish hajmi osha boshlagandi.
14-iyul kuni Latviya Seymi (parlamenti) 2023-yil 1-yanvardan boshlab Rossiyadan tabiiy gaz olishni to‘liq taqiqlash haqida qaror qabul qildi.
1-apreldan Rossiya hukumati “dushman mamlakatlar” (Rossiya hukumati Yevroittifoq mamlakatlarining barchasini ham shu toifaga kiritadi) gaz uchun hisob-kitoblarni Rossiya rublida amalga oshirishini talab qilgan va aks holda gaz eksporti to‘xtatilishini aytgandi. Polsha, Bolgariya, Finlyandiya va Niderlandiya Moskvaning bu shartidan allaqachon bosh tortgan.
Eslatib o‘tamiz, “Gazprom” 27-iyul, chorshanba kunidan boshlab “Shimoliy oqim” quvuri orqali gaz yetkazib berish quvvatini 20 foizidan ko‘p bo‘lmagan darajaga qisqartirdi. Gaz hajmi kuniga 33 million kub metrdan ko‘p bo‘lmagan miqdorda, umumiy 167 million kubometrni tashkil qiladi.
Izoh (0)